यस्तो बाकस जस्तो घरमा भेटिए अमेरिकामा ६९ कागपत्रविहिन


प्रकाशित मिति : फाल्गुन २०, २०७५ सोमबार

अमेरिकाको न्यु मेक्सिकोमा २० चौडाई र २० फुट लम्बाई भएको एउटा बाकसजस्तो घरभित्र लुकाएर राखिएको अवस्थामा ६९ कागजपत्रविहिन आप्रवासीहरुलाई फेला पारिएको छ । मानवतस्करहरुले कागजपत्रविहिनहरुलाई लुकाईछिपाई राख्नका लागि त्यस्तो घरको प्रयोग गरेको आइसले जनाएको छ ।

६९ जनामध्ये ६ जना अभिभावक नभएका टिनएजरहरु रहेको जनाइएको छ । अधिकांश आप्रवासीहरु ग्वाटेमाला र इक्वेडरका भएको जनाइएको छ । ट्वाइलेट समेत नभएको उक्त स्थानमा बाथरुम प्रयोग नगर्न सुचना समेत टासिएको पाइएको छ ।

त्यहाँ राखिएका आप्रवासीहरुलाई असाध्यै कम पानी र खाना दिने गरिएको जनाइएको छ । आपराधिक मानवतस्करीको गिरोहले सामान्य मानव जीवनको समेत सम्मान नहुने गरी यस्तो अवस्थामा उनीहरुलाई राखेको आइसका विशेष एजेन्टले जनाएका छन् ।

ग्वाटेमालाको ३८ बर्षीय थोमस मिगेललाई उक्त कार्यमा संलग्न रहेको अभियोगमा पक्राउ गरिएको छ । मानव तस्करीमा संलग्न रहेको र अमेरिकाबाट देशनिकाला भइसकेपछि पनि गैरकानुनी रुपमा पुन प्रवेश गरेको अभियोगमा मिगेलबिरुद्ध मुद्दा दायर गरिएको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com