‘प्रकृया पुरा नहुँदै सबै पाइयो भन्नु भन्दा संसदलाई बिश्वास गरेर पर्खौं’
प्रकाशित मिति : माघ १४, २०७५ सोमबार
एनआरएनए आईसीसीका उपाध्यक्ष कुल आचार्यले एनआरएन नागरिकताका सन्दर्भमा प्रकृया पुरा नहुँदै सबै कुरा प्राप्त भयो भन्नु भन्दा पनि सिंगो संसदप्रति पूर्ण बिश्वास गर्दै अन्तिम घडीसम्म पर्खनु हितमा हुने बताउनुभएको छ । संघीय संसदको प्रतिनिधिसभा अन्तर्गतको राज्य व्यवस्था तथा सुशासन समितिले नागरिकता ऐन २०६३ मा एनआरएन नागरिकतामाथिको संशोधन प्रस्तावलाई पारित गरेपछि आचार्यले यस्तो प्रतिकृया दिनुभएको हो । संसोधन प्रस्तावलाई संसदको पूर्ण बैठकले अनुमोदन गरेपछि कानुनको रूपमा कार्यान्वयन हुनेछ ।
संविधानले ब्यवस्था गरे अनुसार हामी गैरआवासीय नेपाली नागरिकता प्राप्त गर्ने अन्तिम पलमा पुगेको जनाउँदै आचार्यले गैरआवासीय नेपाली नागरिकताको ब्यवस्था सहित सरकारले संसदमा पेस गरेको नागरिकता ऐन संसोधन बिधेयक सम्बन्धित समितिमा छलफल भएर अन्तिम निष्कर्षमा पुग्दै गरेको जनाउनुभएको छ । यसै क्रममा एनआरएनसँग सम्बन्धित बिषयहरुले बिशेष महत्व पाएको र संसदका सम्बन्धित समितिका पछिल्ला बैठकहरुले एनआरएनको बिषयलाई सकारात्मक रुपमा लिएकोमा आफूहरुलाई थप उत्साही बनाएको आचार्यले बताउनुभएको छ ।
नागरिकता प्राप्त गर्न नेपाली बोल्नु पर्ने, गृह मन्त्रालयबाट मात्रै नागरिकता लिन सकिने जस्ता प्रावधानहरु हटाएमा अहिलेको जमाना सुहाउदो र सजिलो हुने तथा आफूहरुले यो कुरा सांसदहरुसम्म पुराएको भन्दै आचार्यले भन्नुभयो – ‘तर पनि प्रकृया पुरा हुन धेरै बाँकी छ । निर्णय हुनु पर्ने बिषय पनि धेरै नै छन् ।’