संसदीय समितिबाट पारित प्रस्तावमा एनआरएन नागरिकताबारेका तीन मुख्य संसोधन
प्रकाशित मिति : माघ १४, २०७५ सोमबार
संघीय संसदको प्रतिनिधिसभा अन्तर्गतको राज्य व्यवस्था तथा सुशासन समितिले नागरिकता ऐन २०६३ मा एनआरएन नागरिकतामाथिको संशोधन प्रस्तावलाई पारित गरेको छ । जसमा एनआरएन नागरिकताका सन्दर्भमा नागरिकता ऐन संसोधन गर्न ल्याइएको विधयेकमा केही विषयहरु संसोधन गरिएका छन् । गैरआवासीय नेपाली संघले नेपाल सरकारले संघीय संसदमा दर्ता गराएको नेपाल नागरिकता ऐन २०६३ लाई संशोधन गर्न बनेको विधेयकप्रति संघले ९ वटा बुँदामा सुझाव दिएको थियो ।संसदीय समितिले पारित गरेको सो संसोधन प्रस्तावलाई संसदको पूर्ण बैठकले अनुमोदन गरेपछि कानुनको रूपमा कार्यान्वयन हुनेछ।
विधेयकमा के थियो ? के संसोधन गरियो ?
१, गैरआवासीय नेपालीलाई दिइने नागरिकताका सम्बन्धमा विधेयक मस्यौदामा राजनीतिक अधिकारबाहेकको नागरिकता दिने भन्ने शब्दावली उल्लेख गरिएको थियो । तर सो शब्दावलीलाई हाल परिमार्जन गरेर संविधान बमोजिम आर्थिक, सामाजिक र सांस्कृतिक अधिकार प्रयोग गर्न पाउनेछन् भन्ने व्यवस्था गरिएको छ ।
२, गैरआवासिय नेपालीले नागरिकता लिनलाई गृह मन्त्रालय नै आउनुपर्ने विधेयकमा उल्लेख गरिएको थियो । त्यसलाई परिमार्जन गरेर गृह मन्त्रालय वा गृह मन्त्रालय मातहताका निकायहरुबाट गैरआवासिय नागरिकता लिन सकिने व्यवस्था गरिएको छ । अरूले जस्तै एनआरएनले पनि जिल्ला प्रशासन कार्यालयबाटै एनआरएन नागरिकता लिन पाउनेछन् ।
३ एनआरएन नागरिकता लिनका लागि नेपाली नागरिकता प्रमाणपत्र त्यागेको व्यहोराको पत्र विदेशबाटै ल्याएर पेश गर्नुपर्ने विधेयकमा उल्लेख थियो । त्यसलाई परिमार्जन गरेर विदेशमा नागरिकता त्यागेको भन्ने प्रमाण ल्याउनु पर्ने नभई स्वदेशबाटै सो व्यहोराको पत्र लिएर पेश गर्नुपर्ने व्यवस्था गरिएको छ ।