गैरआवासिय नागरिकता दिने संशोधन प्रस्ताव पारित, एनआरएनए अमेरिकाद्धारा निर्णयको स्वागत
प्रकाशित मिति : माघ १४, २०७५ सोमबार
बिदेशमा रहेका नेपालीहरुलाई गैरआवासिय नेपाली नागरिकता दिने बिषय टुंगो लाग्ने भएको छ । यसले विश्वभर रहेका नेपालीहरुमा खुसी ल्याएको छ । बाध्यता या रहरमा बिदेशीएका नेपालीहरुलाई कानुनत नागरिकता दिने बिषयमा संसदको राज्य व्यवस्था तथा सुशासन समितिले संशोधन प्रस्तावलाई पारित गरेपछि गैरआवासिय नेपालीहरुले नागरिकता पाउने बिषयको टुंगो लाग्ने भएको छ ।
विदेशमा रहेका नेपालीहरुलाई नागरिकता दिने बिषयमा धेरै चरणमा छलफल तथा बिदेशमा रहेका नेपालीहरुको निरन्तर दबावपछि संसदको राज्य व्यवस्था तथा सुशासन समितिले गरेको हो ।
सोमबार सम्पन्न राज्य व्यवस्था तथा सुशासन समितिमा सांसद डा. सूर्य पाठकले राखेको संशोधन प्रस्तावलाई पारित गरिएको छ । सांसद पाठकले बिदेशमा रहेका नेपालीहरुका लागि आजको दिन निकै खुसीको दिन रहेको र समृद्ध नेपाल निमार्णका लागि यो सुखद सुरुवात भएको प्रतिकृया दिएका छन् । नेपाल सरकारले संसदमा प्रस्तुत गरेको नागरिकता ऐन २०६३ मार्फत गैरआवासिय नेपालीलाई प्रदान गर्ने एनआरएन नागरिकता संघले माग गरे बमोजति हुने गरी पारित गरेको बताइन्छ । संसदीय समितिले पारित गरेको संसोधन प्रस्तावलाई संसदको पूर्ण बैठकले अनुमोदन गरेपछि कानुनको रुपमा कार्यन्व्यन हुनेछ ।
एनआरएनए अमेरिकाद्धारा निर्णयको स्वागत
यसैबीच एनआरएनए अमेरिकाका अध्यक्ष डा. केशव पौडेलले लामो संघर्षपछि गैरआवासिय नागरिकता पाउने भएकोमा खुसी व्यक्त गर्दै गैरआवासिय नागरिकता दिने निर्णयको स्वागत गरेका छन् ।
डा. पौडेलले केही बुँदाहरु सच्याउनुपर्ने खालका रहेको भएपनि यो निर्णयले बिदेशमा रहेका नेपालीहरुमा खुसी ल्याएको बताए । हामीले कुटनीतिक नियोगबाट नागरिकता पाउनुपर्ने माग राखेका थियौं, तर अहिले जिल्ला प्रशासनबाट लिने भनिएको छ, यो बिषय समयाअनुकुल नेपाल सरकारले सुधार गर्नेमा आफु विश्वस्त रहेको बताए ।
यसैगरी डा.पौडेलले बिदेशमा रहेका नेपालीहरुका छोराछोरीले नागरिकता लिँदा नेपालीभाषा बोल्नुपर्ने भन्ने प्रावधान समेत सच्याउनुपर्ने बताएका छन् । अध्यक्ष पौडेलले गैरआवासिय नागरिकताको बिषयलाई आजको सुखद निर्णयको दिन सम्म आईपुग्दा सहयोग गर्ने सबैमा आभार व्यक्त गर्दै एनआरएनए अमेरिका आगामी दिनमा अझै सकृय रुपमा लाग्ने प्रतिवद्धता व्यक्त गरेका छन् ।
यसैबीच एनआरएन अभियान्ताहरुले सामाजिक संजाल फेसबुक तथा टुईटर मार्फत गैरआवासिय नागरिकता दिने बिषयमा भएको निर्णयको स्वागत गरेका छन् । केहीले कुटनीतिक नियोगबाट नागरिकता पाउनुपर्ने माग राखेको भएपनि अधिकाशंले खुुसी व्यक्त गर्दै स्टाटस लेखेका छन् ।