वाइडबडी जहाजको पहिलो उडान साउन १६ गते दोहामा
प्रकाशित मिति : असार २६, २०७५ मंगलबार
![](https://i0.wp.com/www.khasokhas.com/wp-content/uploads/2018/07/Capture-37.jpg?fit=919%2C541&ssl=1)
राष्ट्रिय ध्वाजबाहक नेपाल वायुसेवा निगमले ल्याएको वाइडबडी (३३०-२२०) सिरिज जहाजको पहिलो व्यावसायिक उडान संयुक्त कतारको दोहामा हुने भएको छ । पाँच लाख भन्दा धेरै नेपाल रोजगारीमा रहेको कतारको राजधानी दोहामा यही साउन १६ गते नेपाल वायु सेवाको वाइडबडीले पहिलो उडान भर्ने भएको हो ।
नेपालको हवाई इतिहासमा पहिलोपटक दुई सय ८० सिट क्षमताको जहाजले दोहाबाट उडान सुरु गर्न लागेको हो। नेवानिले अहिले दुई वटा एयरबस र एउटा बोइङ ७५७ मार्फत अन्तर्राष्ट्रियतर्फ आठ गन्तव्यमा उडान गर्दै आएको छ।
दुईवटा वाइडबडी जहाजमध्ये पहिलो जहाज यही १४ असारमा काठमाडौँ आइसकेको छ । जहाज आएको एक महिनापछि नेवानिले व्यावसायिक उडान गर्ने भएको हो । महिना दिनभित्रै व्यावसायिक उडान गर्ने गरी नेपाल नागरिक उड्डयन प्राधिकरण विमानस्थल कार्यालयसँग उडान तालिका स्वीकृतिका लागि यसअघि नै सहमति माग गरिएको थियो ।