Follow @khasokhasmag

भारतीय राष्ट्रपतिको भ्रमणमा कमान्डो टोली पनि नेपाल आउने


प्रकाशित मिति : कार्तिक ५, २०७३ शुक्रबार

भारतीय राष्ट्रपति प्रणव मुखर्जीको आसन्न नेपाल भ्रमणको तयारीबारे बिहीबार नेपाल र भारतका अधिकारीबीच छलफल भएको छ । भ्रमणको तयारीलाई दुवै देशका तर्फबाट अन्तिम रूप दिनका लागि नेपाल आएको भारतीय टोली र परराष्ट्र मन्त्रालयका अधिकारीबीच छलफल भएको हो ।

परराष्ट्रका एक अधिकारीका अनुसार शिष्टाचार महापालको नेतृत्वमा आएको भारतीय टोलीले नेपालका समकक्षीको टोलीसँग भ्रमण तयारीबारे जानकारी लिएका थिए । ‘कुनै पनि देशको विशिष्ट व्यक्तिको भ्रमण अघि गरिने यो सामान्य औचारिक प्रक्रिया हो’, परराष्ट्रका एक अधिकारीले भने, ‘उहाँहरूलाई हामीले भ्रमणबारे भइरहेको तयारीको जानकारी गरायौँ । ’ ती अधिकारीका अनुसार टोलीले राष्ट्रपतिले भ्रमण गर्ने भनिएको पोखरा, जनकपुरलगायत स्थानको अवलोकन भ्रमण गर्नेछन् ।

परराष्ट्र मन्त्रालयनिकट स्रोतका अनुसार भारतीय पक्षबाट राष्ट्रपतिको भ्रमणका लागि करिब चार सयको सङ्ख्यामा भारतीय कमान्डो टोली पनि आउने छन् । ‘सुरक्षा खतरा वा त्यस्तो कुनै विशेष परिस्थिति भनेर होइन कि प्रोटोकलको कारणले हो,’ परराष्ट्रका ती अधिकारीले भने, ‘एक वर्षअघि भारतीय प्रधानमन्त्री नरेन्द्र मोदीको भ्रमणको बेला पनि करिब दुई सयको सङ्ख्यामा कमान्डो टोली खटिएको थियो । ’

दुई दिनसम्म रहने करिब दर्जन अधिकारीको टोलीसँगको छलफलपछि भारतीय राष्ट्रपति प्रणव मुखर्जीको भ्रमणको अन्तिम तालिका सार्वजानिक गरिने गाेरखापत्रमा खबर छ । मुखर्जी भाइटीकाको भोलिपल्ट अर्थात कात्तिक १७ मा तीनदिने राजकीय भ्रमणमा नेपाल आउने तय भए पनि औपचारिक घोषणा भएको छैन ।

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com