Follow @khasokhasmag

‘साथीहरुले मलाई पागल भने’ (भिडियो)


प्रकाशित मिति : कार्तिक ४, २०७३ बिहीबार

लोकसेवा आयोगको परीक्षा दिन नमानेर अमेरिका जान खोज्दा आफूहरुलाई साथीहरुले पागल भनेको बताउने न्युयोर्कका सफल व्यवसायी कानुन व्यवसायी केशव सेडाईसँगको अन्तरवार्ता

अमेरिका निवासी सफल नेपाली कानुन व्यवसायी केशव सेडाईले आफू अमेरिकामा रहेपनि नेपालको मायाभने आफ्नो मनभित्र सधै रहने बताउनुभएको छ । एबीसी टेलिभिजनमा कार्यक्रम ‘टक अफ द टाउन युएसए’मा कुराकानी गर्दै सेडाईले आफू नेपालको विमानस्थलमा झर्नासाथ सबैभन्दा पहिलो नेपालको माटो छोएर ढोग्ने गरेको बताउनुभयो ।

अमेरिकन ब्रोडकास्टिङ कर्पोरेशन न्युयोर्कसँगको सहकार्यमा नेपालको एबीसी टेलिभिजनबाट हरेक मंगलबार बेलुका साढे ७ बजे प्रशारण हुने कार्यक्रमका संचालक किशोर पन्थीसँग कुरा गर्दै विगत २७ बर्षदेखि अमेरिकामा बस्दै आउनुभएका सेडाईले यस्तो बताउनुभएको हो ।

कार्यक्रम टक अफ द टाउनमा कुरा गर्दै कानुन व्यवसायी सेडाईले नेपालमा कुनै बिपत्ति आउँदा आफूलाई दुख लाग्ने बताउनुभयो । नेपालमा महाभूकम्प गएको समाचार हेर्दा आफ्नो छातीमा पीडा महसुस भएको र गला अबरुद्ध भएको सेडाईले बताउनुभयो । त्यसपछि सेडाईले भूकम्पपीडितको सहयोगका लागि अभियान संचालन गर्नुभएको थियो ।

img_9342

अमेरिकामा रहँदा पनि सामाजिक क्षेत्रमा योगदान दिदै आउनुभएका सेडाइ नेपाली र नेपाली संघसंस्थालाई सहयोगको आवश्यकता पर्दा सहयोग गर्नेमा अग्रपंक्तिमा हुनुहुन्छ । नेपालमा गएको महाभूकम्पपछि आफ्नै व्यक्तिगत र एकल पहलमा रकम संकलन गर्नुभएका सेडाईले ८ लाख आफैले थपेर भूकम्पपीडितका लागि ६५ लाख खर्च गर्नुभएको थियो ।

उहाँले गोफण्डमीमार्फत झण्डै ५६ हजार अमेरिकी डलर संकलन गर्नुभएको थियो । संकलित रकम शतप्रतिशत नै भूकम्पपीडितका लागि खर्च गर्ने वाचा गरे अनुरुप आफैले लमजुङको चिती पुगेर भूकम्पपीडित १ सय परिवारलाई १२ हजार डलरको कर्कटपाता लगायतका राहतसामाग्री वितरण गर्नुभएको थियो । त्यस्तै २५ सय अमेरिकी डलरको खाद्यान्न र सामाग्री काठमाडौं नजिकै रहेको बोडे क्याम्पका भूकम्पपीडितलाई प्रदान गर्नुभएको थियो ।

त्यो बाहेक हिमालयन क्लाइमेट नामको संस्थालाई दुई किस्तागरी ५० हजार अमेरिकी डलर प्रदान गर्नुभएको थियो । यो संस्था गोरखा, लमजुङ र सिन्धुपाल्चोकमा भूकम्पपीडितका लागि घर निर्माणकार्यको प्रकृयामा रहेको छ । गोरखा, लमजुङ र सिन्धुपाल्चोकमा यो रकम भूकम्पपीडितका ५० वटा घरहरु निर्माणमा लगाइने भएको छ । निर्माणकार्य सन् २०१७ सम्ममा पूरा हुने कानुन व्यवसायी सेडाईले विश्वास लिनुभएको छ ।

अरुबेला उनी खासै चर्चामा आइरहन वा मिडियामा छाइरहन नरुचाउने तर कसैलाई समस्या परेको खण्डमा भने सहयोगका लागि कहिल्यै पछाडि पर्नुहुन्न, अमेरिकामा रहेर कानुनी पेशामा आवद्ध रहेका कानुनविद् केशव सेडाईं । म्यानहटनको अफिसमा नेपालका भन्दा धेरै अरु देशका ग्राहकसंग व्यस्त रहने उहाँ झट्ट हेर्दा नेपाली मूलको देखिनुहुन्न । तर मनभित्र भने नेपालको अगाध माया बोकेका सेडाईं लमजुङको चिदीमा जन्मिनुभएको हो झण्डै ५० वर्ष अगाडि ।

बुबा लक्ष्मण सेडाई र आमा हरिप्रिया सेडाईका जेठा छोरा केशव सेडाईले ८ कक्षासम्म लमजुङको चिदीमा रहेको सामान्य विद्यालयमा अध्ययन गर्नुभयो । त्यसपछि भने फर्पिङको त्रिभुवन आदर्श माध्यामिक विद्यालयबाट उहाँले एसएलसी सम्मको अध्ययन गर्नुभयो । पछि काठमाडौंको ल क्याम्पसबाट बिएल सकेर उहाँ थप अध्ययनका लागि सन् १९९० मा अमेरिकातिर हान्निनुभयो । अमेरिकाको नेब्रास्कामा व्यवस्थापन विषय पढेपछि उहाँले युनिभर्सिटी अफ नेब्रास्काबाट बिजनेशमा मास्टर्स गर्नुभयो । अध्ययनकै क्रममा उहाँले कलेजले नै दिएको रेसिडेन्स हल डाइरेक्टरको जागिर पनि खानुभयो । केशव सम्झनुहुन्छ –“त्यतीबेला मैले अमेरिकाको वकिल भएर संयुक्त राष्ट्रसंघमा जागिर खाने आफ्नो लक्ष्य सुनाउदा कसैले पत्याएनन्, बरु हासोको पात्र बनाए । ”

तर पछि उहाँले आफ्नो लक्ष्य पूरा गरेरै छाड्ने अठोट लिनुभयो । अनि युनिभर्सिटी अफ जर्जियाबाट कानुनमा मास्टर्स समेत गर्नुभयो । त्यसपछि एटलान्टाको एउटा ल फर्ममा जागिर गर्नुभएका सेडाई सन् १९९५ तिर न्युयोर्क आएर वल्र्ड ट्रेड सेन्टरमा रहेको एउटा ल फर्ममा काम गर्न थाल्नुभयो । यसै दौरान उहाले सन् १९९६ मा संयुक्त राष्ट्रसंघमा जागिर पनि खानुभयो । त्यतिबेला उहालाई जीवनको एउटा सफलता मिलेको अनुभव भयो । किनभने उहाले कानुन पढेर संयुक्त राष्ट्रसंघमा जागिर खाने कुरा सुनाउदा कसैले पत्याएका थिएनन् । संयुक्त राष्ट्रसंघमा जागिरका शिलशिलामा उहाले युगोस्लाभिया र क्रोयशियामा काम गर्नुभयो । जागिरबाट फर्केपछि उनले वकिलको लाइसेन्सपनि प्राप्त गर्नुभयो । यसै दौरानमा फिजिकल थेरापिस्ट रितुसंग प्रेममा परेका सेडाईले सन् १९९८ मा प्रेम विवाह पनि गर्नुभयो । त्यसपछि उहाँ २ छोरा र एक छोरीका पिता समेत भइसक्नुभएको छ ।

विवाहपछि सेडाईले आफ्नै ल फर्म खोल्नुभयो । सन् १९९९ मा उहाले न्युयोर्कको रिचमण्ड हिलमा आफ्नै ल फर्म खोल्नुभएको थियो । पछि सन् २००१ मा उहाले आफ्नो ल फर्म रिचमण्ड हिलबाट न्युयोर्कको केन्द्र वल्र्ड ट्रेड सेन्टर नजिकै सार्नुभयो । वल्र्ड टे«ड सेन्टरमा दोश्रो हमला हुंदा उहाँ आफ्नै ल फर्ममा हुनुहुन्थ्यो । वल्र्ड ट्रेड सेन्टरमा हमला भईसकेपछि उहाले आफ्नो ल फर्म डेढ महिना बन्द गर्नुपरेको थियो । त्यो भयानक क्षण सम्झदै उहाँ भन्नुहुन्छ –“हेर्दा हेर्दै वल्र्ड ट्रेड सेन्टर ढल्यो, हामी पनि कार्यालय बन्द गरेर सुरक्षित स्थान तर्फ दौडियौं, म त यति दौडिएँ कि न त त्यसरी पहिले दौडिएको थिएँ न त पछाडि नै दौडिएको छु । ”

सन् २००४ सम्म वल्र्ड ट्रेड सेन्टर नजिकै ल फर्म चलाएका सेडाईले सन् २००५ देखि भने म्यानहटनको १४६ वेस्ट २९ स्ट्रीटमा ल फर्म चलाउदै आएका आउनुभएको छ, अहिलेसम्म । न्युजर्सीको न्युपोर्टमा बस्दै आउनुभएका सेडाई कुनै नेपालीलाई समस्या पर्दा वा कुनै सामाजिक काममा सहयोग आवश्यक परेमा सधै तत्पर रहदै आउनुभएको छ । त्यसैले उहाँ पर्दा पछाडिका समाजसेवीका रुपमा परिचित हुनुहुन्छ न्युयोर्कमा । सेडाईले २०६२/०६३ को जनआन्दोलनमा राजतन्त्र विरुद्धको आन्दोलनमा आर्थिक, भौतिक र नैतिक सहयोग गर्नुभयो । अमेरिकन इमिग्रेशन लयर एसोसियसन, अमेरिकन बार एसोसियसन, न्युयोर्क स्टेट बार एसोसियसनमा आबद्ध रहनुभएका सेडाई भन्नुहुन्छ –“भविश्यमा नेपाल फर्कने योजना त छ तर कहिले फर्कने तय गरिसकेको छैन । ”

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com