एसाइलमको फ्रडको अभियोगमा न्युयोर्कको क्वीन्सका इमिग्रेशन वकिल पक्राउ
प्रकाशित मिति : चैत्र १६, २०७४ शुक्रबार
नक्कली एसाइलम फाइल गरेको अभियोगमा न्युयोर्कको क्वीन्स सन्निसाइडमा कानुन व्यवसाय गर्दै आएकी एकजना कानुन व्यवसायी पक्राउ परेकी छिन् । सन्नीसाइडमा कानुन व्यवसाय संचालन गर्दै आएकी आन्द्रिया दुमित्रुले १ सय ८० भन्दा बढी नक्कली एसाइलम फाइल गरेको युएस एटोर्नी अफिसले आरोप लगाएको छ ।
डिपार्टमेन्ट अफ होमल्याण्ड सेक्युरिटीको अनुसन्धानबाट उनले सन् २०१२ देखि २०१७ सम्म १ सय ८० भन्दा धेरै नक्कली एसाइलमहरु फाइल गरेको पत्ता लागेको जनाइएको छ । उनले एसाइलम आवेदकका बनाइएका नक्कली कथाहरु फाइल गरिदिएको जनाइएको छ ।
कानुन व्यवसायी दुमित्रुले उनीबिरुद्धका सबै अभियोगहरु अस्वीकार गरेकी छिन् । उनलाई हरेक एसाइलम फ्रडको एउटा काउन्ट अभियोग लगाइएको छ । उनी दोषी प्रमाणित भएमा १५ बर्षसम्म जेल जानसक्ने जनाइएको छ ।
