अमेरिकी सिनेटको अध्यागमन बहस असफल, पारित भएनन् तीन वटै विधयेक
प्रकाशित मिति : फाल्गुन ३, २०७४ बिहीबार
बाल्यकालमा अमेरिका आएका झण्डै २० लाख कागजपत्रविहिनलाई अमेरिकी नागरिकताको बाटोमा लैजाने र सिमा सुरक्षामा कडाई गर्ने सन्दर्भको अमेरिकी सिनेटको अध्यागमन बहस अन्तत असफलतामा टुंगिएको छ । दुईदलीय अध्यागमन सम्झौता अमेरिकी सिनेटबाट पनि अस्वीकृत भएपछि बाल्यकालमा अमेरिका आएर डाका प्राप्त गरेका कागजपत्रविहिनको भविश्य थप अन्यौलग्रस्त भएको छ ।
दुईदलीय अध्यागमन सम्झौताका पक्षमा सिनेटमा जम्मा ५४ मत प्राप्त भएको छ भने विपक्षमा ४५ मत प्राप्त भएको छ । ह्वाइट हाउसले अध्यागमन सम्झौता पारित हुन नदिन भिटो प्रयोग गर्ने चेतावनीपछि अध्यागमन सम्झौता सिनेटमा तुहिएको हो । सिनेटबाट विधयेक पारित हुन ६० मतको आवश्यकता पर्नेमा ६ मत अपुग भएको छ ।
बिहिबार सिनेटमा मतदान भएको अर्को ह्वाइट हाउस समर्थित बिधयेक पनि पारित हुन सकेन । जसमा डिभी लोटरी र चेन माइग्रेशनको अन्त्यको विषय समेत समेटिएको थियो । उक्त विधयेकका पक्षमा जम्मा ३९ मत र विपक्षमा ६० मत खसेको थियो । जबकी विधयेक पारित हुन ६० मत आवश्यक थियो । यो विधयेक पारित हुन नसक्दा ट्रम्पको अध्यागमन योजना पनि असफल भएको छ ।
त्यस्तै बिहिबार नै सदनमा डाकालाई नसमेटेको अर्को अध्यागमन बिलमा समेत मतदान गरिएको थियो । त्यो बिल पनि पारित हुन सकेन । सिनेटर सुसान कोलिन्सले कुनै पनि बिलमा आफूहरुले ६० मत अवस्था आइरहेको भन्दै त्रास व्यक्त गरेकी छिन् ।
डाकाबारेका दुईवटै बिलहरु पारित हुन नसक्दा अबको २० दिनमा खारेज हुँदै गरेको डाकामा रहेकाहरुको भविश्य थप अन्यौलग्रस्त भएको छ ।