अमेरिकी नागरिकताका लागि अब कठिन र धेरै प्रश्नहरु, यस्ता छन् १२८ प्रश्नहरु
Photo: USCIS
युएससीआईएसले सन् २०२५ को नयाँ नागरिकता परीक्षा लागु गर्ने सम्बन्धी आधिकारिक सूचना आज फेडरल रजिष्ट्ररमा प्रकाशित गरेको छ। । नयाँ परीक्षा अक्टोबर २०, २०२५ वा त्यसपछि नागरिकताका लागि आवेदन दिने व्यक्तिहरूका लालागि लागु हुनेछ । अक्टोबर २० पछि नागरिकता आवेदन दिनेहरुका सन्दर्भमा नयाँ परीक्षा प्रणाली लागु हुने भएतापनि त्यस अगाडि आवेदन दिनेहरुले भने पूरानै परीक्षा प्रणाली अन्तरगत परीक्षा दिन पाउनेछन् ।
यो परिवर्तनले हाल चलिरहेको सन् २००८ को नागरिकता परीक्षामा महत्त्वपूर्ण बदलाव ल्याएको छ र यो सन् २०२० को नागरिकता परीक्षा लाई पुन लागु गर्ने प्रक्रिया हो। अघिल्लो ट्रम्प प्रशासनले सन् २०२० मा नागरिकता परीक्षामा परिवर्तन गरेपनि पछि बाइडेन प्रशासनले त्यसलाई लागु गरेको थिएन ।
नयाँ परीक्षा नागरिकताको अन्तर्वार्तामा सोधिने प्रश्नहरूको सङ्ख्या १० बाट बढाएर २० बनाइएको छ । आवेदकहरूले पास हुनका लागि कम्तीमा १२ प्रश्नको सही जवाफ दिनुपर्नेछ। कुल सम्भावित प्रश्नहरूको सङ्ख्या पनि १०० बाट बढाएर १२८ बनाइएको छ।
सबै १२८ प्रश्नहरु हेर्न यहाँ क्लीक गर्नुहोला ।
परीक्षाको अङ्ग्रेजी भाषाका बोल्ने, पढ्ने र लेख्ने भागहरू उस्तै रहनेछन्, तर नयाँ प्रश्नहरू साधारण घोकाइभन्दा पर रहेर थप व्यापक सोचको आवश्यकता पर्ने गरी डिजाइन गरिएका छन्। कतिपय प्रश्नहरु किनबाट सुरु गरिएका छन् । स्वतन्त्रताको घोषणापत्र किन महत्त्वपूर्ण छ ? जस्ता प्रश्नहरु समावेश गरिएका छन् । युएससीआईएसले नयाँ परीक्षाका लागि अध्ययन सामग्रीहरू आफ्नो वेबसाइटमा उपलब्ध गराइसकेको छ, जसमा १२८ वटा प्रश्न र तिनीहरूका जवाफहरू समावेश छन्।
अन्तर्वार्ताको समयमा, आवेदकले १२ वटा प्रश्नको सही जवाफ दिएर पास भएपछि वा ९ वटा प्रश्नको गलत जवाफ दिएर फेल भएपछि अधिकारीले परीक्षा लिन बन्द गर्नेछन्। यो सन् २०२० को संस्करणको प्रक्रियाबाट एउटा प्रक्रियागत परिवर्तन हो, जसमा आवेदकको प्रदर्शन जस्तो भए पनि सबै २० वटै प्रश्न सोधिन्थ्यो।
६५ वा सोभन्दा बढी उमेरका र कम्तीमा २० वर्षदेखि कानुनी स्थायी निवासी रहेका आवेदकहरूका लागि सरलीकृत परीक्षण जारी रहनेछ। यी आवेदकहरूलाई २० वटा विशेष प्रश्नहरूको समूहबाट १० वटा प्रश्न सोधिनेछ र पास हुनका लागि उनीहरूले ६ वटाको सही जवाफ दिनुपर्नेछ।
