अब युएससीआईएसका अधिकारीहरूलाई नै आप्रवासी पक्राउ गर्ने अधिकार प्रदान
प्रकाशित मिति : भाद्र १८, २०८२ बिहीबार
होमल्याण्ड सेक्युरिटी सेक्रेटरी क्रिस्टी नोएम (डीएचएस फोटो: टिया डुफोर)
ट्रम्प प्रशासनले अमेरिकाको अध्यागमन एजेन्सी युएससीआईएसका अधिकारीहरूलाई आप्रवासी पक्राउ गर्ने, हतियार बोक्ने र वारेन्ट कार्यान्वयन गर्ने नयाँ अधिकार प्रदान गरेको छ । कर्मचारीहरूलाई व्यापक कानुन प्रवर्तन अधिकार दिने नयाँ नियम फेडरल रजिष्ट्ररमा प्रकाशित भएको छ ।
यो कदमले तोकिएका युएससीआईएसका अधिकारीहरूलाई अध्यागमन कानुनका नागरिक र आपराधिक उल्लङ्घनहरूको अनुसन्धान र कार्यान्वयन गर्ने अधिकार दिन्छ। यो भूमिका पहिले अमेरिकी अध्यागमन तथा भन्सार प्रवर्तन आइसजस्ता अन्य संघीय निकायहरूमा मात्र सीमित थियो।
नयाँ नियमले युएससीआईएसलाई विशेष एजेन्टहरूको बल सिर्जना गर्न सक्षम बनाउँछ। यी एजेन्टहरूलाई १८११ अधिकारीहरूको रूपमा वर्गीकृत गरिएको छ। उनीहरूलाई अध्यागमन कानुन उल्लङ्घन गर्नेहरूको अनुसन्धान, पक्राउ,र अभियोजनका लागि प्रस्तुत गर्ने अधिकार दिइएको छ। यी एजेन्टहरूलाई हतियार बोक्ने, खोजी र पक्राउ वारेन्टहरू कार्यान्वयन गर्ने र आवश्यकता अनुसार बल प्रयोग गर्ने अधिकार दिइनेछ। यसले उनीहरूको शक्तिलाई अन्य संघीय कानुन प्रवर्तन निकायहरूसँग बराबर बनाउँछ।
युएससीआईएसका निर्देशक जोसेफ बी एडलोले यो विस्तार एजेन्सीको मिशनका लागि महत्त्वपूर्ण भएको कुरामा जोड दिएका छन्। अध्यागमन अपराधहरूलाई अझ राम्रोसँग सम्बोधन गर्ने तथा अध्यागमन ठगी गर्नेहरूलाई जवाफदेही बनाउने उनको भनाई छ ।
नियम अनुसार यो अधिकारको विस्तार युएससीआईएसको मिशनहरूलाई बलियो बनाउने उद्देश्यले गरिएको हो। अन्तिम नियमले स्पष्ट रूपमा युएससीआईएसका निर्देशकलाई तीब्र गतिको देशनिकालाको आदेश दिने र अध्यागमन कानुनहरूको उल्लङ्घनको अनुसन्धान गर्ने अधिकार दिएको छ ।
युएससीआइएसका विशेष एजेन्टहरूले आईस र सीबीपीमा रहेका आफ्ना समकक्षहरूको जस्तै प्रशिक्षण प्राप्त गर्नेछन्। एजेन्सीले यी नयाँ पदहरूका लागि भर्ती र प्रशिक्षण तुरुन्तै सुरु गर्ने योजना बनाएको छ।