न्यूयोर्कको टाइम्स स्क्वायरमा गोली चलाएको आरोपमा युवक पक्राउ
प्रकाशित मिति : श्रावण २४, २०८२ शनिबार
Photo by Meriç Dağlı
अमेरिकाको न्यूयोर्क सहरको टाइम्स स्क्वायरमा गोली चलाएको आरोपमा प्रहरीले एक जना युवकलाई पक्राउ गरेको छ। तीन जनालाई गोली हानेर घाइते बनाएपछि १७ वर्षीय एक युवकलाई प्रहरीले पक्राउ गरेको हो।
विश्वकै सबैभन्दा व्यस्त पर्यटकीय क्षेत्रमध्ये एक, वेस्ट ४४ औं सडक र सेभेन्थ एभेन्युमा रहेका ठूला विज्ञापन बोर्डहरूमुनि गोली चलेको थियो।
प्रहरीका अनुसार ती युवकको नाम सार्वजनिक गरिएको छैन। उनीमाथि मुद्दा दायर गर्ने प्रक्रिया भइरहेको छ।
घटनामा १९ वर्षीय युवकको खुट्टामा, ६५ वर्षीय पुरुषको देब्रे खुट्टामा र १८ वर्षीया युवतीको घाँटीमा छर्रा लागेको छ। तीनै जना अस्पतालमा भर्ना भएका छन्। उनीहरूको अवस्था भने स्थिर रहेको छ।
न्यूयोर्क प्रहरी विभागका अनुसार टाइम्स स्क्वायरमा भएको यो गोलीकाण्ड ‘रेजिङ केन्स’ नामक चिकेन रेस्टुरेन्टबाहिरको झगडाबाट सुरु भएको हो। घटनास्थलबाट एउटा ह्यान्डगन बरामद गरिएको छ।
गत महिना मिडटाउन म्यानह्याटनमा कार्यालय भवनमा भएको गोलीकाण्डमा चार जना कामदारको मृत्यु भएको थियो। न्यूयोर्क प्रहरीले पछिल्ला महिनाहरूमा सहरमा कम स्तरको बन्दुकबाट हुने हिंसा देखिएको बताएको छ।
यो घटना न्यूयोर्क मेयरको चुनाव हुन तीन महिना बाँकी रहँदा र अमेरिकी राष्ट्रपति डोनाल्ड ट्रम्पले वाशिङ्टन डीसीका सडकमा सङ्घीय एजेन्ट पठाएर युवाहरूबाट हुने अपराध नियन्त्रण गर्ने घोषणा गरेको समयमा भएको हो।
शुक्रबार ट्रम्पले वाशिङ्टन डीसीका सडकमा सङ्घीय एजेन्ट पठाउने आदेश दिएका थिए।
वाशिङ्टन डीसीमा हत्या दर अन्य अमेरिकी सहरहरूको तुलनामा अझै उच्च छ। यस वर्ष अहिलेसम्म ९८ वटा हत्या दर्ता भएका छन्। विगत एक दशकयता डीसीमा हत्याको दर बढ्दो क्रममा छ।