अमेरिकालाई युक्रेनको आग्रह – ‘रूसी अर्थतन्त्रको घाँटी थिच्न प्रतिबन्धको बल प्रयोग गर’
प्रकाशित मिति : श्रावण १८, २०८२ आईतबार
युक्रेनी राष्ट्रपति भोलोदमिर जेलेन्स्कीका प्रमुख सल्लाहकार आन्द्रेई येर्माकले अमेरिका समक्ष रूसको व्यापारिक साझेदारमाथि दोस्रो तहका प्रतिबन्ध लगाएर मस्कोको युद्धमुखी अर्थतन्त्रलाई ध्वस्त पार्न आह्वान गरेका छन्।
टेलिग्राममार्फत आइतबार सार्वजनिक सन्देशमा येर्माकले गत १२ महिनामा रूसी रेल सेवामा आएको गिरावटलाई उद्धृत गर्दै भने, “युद्धका लागि केन्द्रित अर्थतन्त्र दबाब थेग्न सक्दैन। उर्जा स्रोतको निर्यातबाट मात्र रूस बाँचेको छ। अमेरिकी प्रस्तावअनुसार दोस्रो तहका ट्यारिफहरूले यो अर्थतन्त्रलाई घाँटी थिच्न सकिन्छ।”
जुलाई १४ मा ट्रम्पले रूसी राष्ट्रपति पुटिनलाई युद्धविरामका लागि ५० दिनको अल्टिमेटम दिएका थिए। तर, जुलाई २९ मा यो अवधि घटाएर १० दिन मात्र राखिएको छ। नयाँ समयसीमा आगामी अगस्ट ८ मा समाप्त हुनेछ।
ट्रम्पको धम्कीपछि रूसी पूर्वराष्ट्रपति दिमित्री मेदभेदेभले ‘यो रूस र युक्रेनबीचको होइन, अमेरिकाको आफ्नै राष्ट्रसँगको युद्धतर्फको कदम हो’, भन्ने प्रतिक्रिया दिएपछि, ट्रम्पले दुई आणविक पनडुब्बीहरूलाई उपयुक्त क्षेत्रहरूमा पठाउने आदेश दिएका छन्।
यसबीच युक्रेनी राष्ट्रपति जेलेन्स्कीले भने, “शान्ति प्रस्तावहरू पटक–पटक दिइएको हो, तर रूसले सधैं त्यसलाई समय तान्ने रणनीतिमा उपयोग गरेको छ। अब रूसमाथि मात्र होइन, उसलाई सहयोग गर्ने सबै स्कीमहरूमाथि पनि प्रतिबन्ध आवश्यक छ।”
जुलाई महिनामा रूसले युक्रेनमा ६,४४३ ड्रोन र मिसाइल प्रहार गर्दै अहिलेसम्मकै उच्च आक्रमण संख्या पुर्याएको छ। युक्रेनी वायुसेनाका अनुसार, आइतवार बिहान मात्रै ७६ ड्रोन र ७ मिसाइल प्रहार गरिएको थियो। तीमध्ये ६० ड्रोन र १ मिसाइल नष्ट गरिएको बताइएको छ।
मायकोलाइभ सहरमा एक मिसाइल आक्रमणमा ७ जना घाइते भएका छन् भने तीनवटा घर पूर्ण रूपमा ध्वस्त भएका छन्। ३७ अन्य भवनहरूमा क्षति पुगेको छ।
रूसका अनुसार, जुलाई महिनामा ३,००८ युक्रेनी ड्रोनहरू खसालिएको छ। त्यस्तै, आइतवार रातभरमा मात्रै ९६ ड्रोनहरू खसालिएको छ ।