इस्लामिक स्टेटलाई आर्थिक सहयोग गरेको आरोपमा अमेरिकी नागरिक पक्राउ
प्रकाशित मिति : श्रावण १८, २०८२ आईतबार
अमेरिकामा एफबीआईले क्यालिफोर्नियाको लङ बिचमा रहेका एक व्यक्तिलाई पक्राउ गरेको छ । उनलाई इस्लामिक स्टेट अफ इराक एन्ड सिरिया लाई आर्थिक सहयोग गरेको आरोपमा पक्राउ गरेको हो ।
अमेरिकी न्याय मन्त्रालयका अनुसार आईएसआईएस अमेरिकी सरकारले विदेशी आतंकवादी संगठनको रूपमा सूचीबद्ध गरेको समूह हो । फिलिपिन्समा जन्मिएर अहिले अमेरिकी स्थायी बासिन्दा बनेका २८ वर्षीय मार्क लोरेन्जो भिल्लानुएभा पक्राउ परेका हुन ।
उनीमाथि संघीय जेलमा २० वर्षसम्मको सजाय हुन सक्ने आरोप लगाइएको छ । उनीमाथि ‘आतंकवादी संगठनलाई सामग्री सहयोग गर्न प्रयास’ गरेको अभियोग लागेको न्याय मन्त्रालयले जनाएको छ ।
अनुसन्धानकर्ताहरूका अनुसार यस वर्षको सुरुवातमा भिल्लानुएभा दुई व्यक्तिहरूसँग सामाजिक सञ्जालमार्फत सम्पर्कमा थिए । जसले आफूलाई आईएसआईएस का लडाकु भनेर चिनाएका थिए ।
ती सन्देशहरूमा भिल्लानुएभाले आईएसआईएस लाई समर्थन गर्ने इच्छा व्यक्त गरेका थिए । उनले आर्थिक सहयोग गर्ने प्रस्ताव राखेका थिए ।
भिल्लानुएभाले ती लडाकुलाई “आफ्नो धर्मको लागि लड्न र मर्न पाउनु गौरवको कुरा हो । यसैबाट स्वर्ग जान सकिन्छ । म चाँडै नै तपाईंहरूसँगै जोडिनेछु ” भनेको सन्देशमा उल्लेख छ ।
पश्चिम युनियनको अभिलेख अनुसार पाँच महिनाको अवधिमा भिल्लानुएभाले दुई जनामार्फत विदेशमा पैसा पुर्याउन १२ पटक गरेर जम्मा १ हजार ६१५ डलर पठाएका थिए ।
एफबीआईले उनको पक्राउका बेला उनको कोठाबाट एउटा बमजस्तो देखिने वस्तु बरामद गरेको छ । जसको फोटो एफबीआईको फेसबुक र एक्स खातामा सार्वजनिक गरिएको छ ।
एफबीआईको लस एन्जलस फिल्ड कार्यालयका कार्यवाहक सहायक निर्देशक प्याट्रिक ग्र्याण्डीले भने, “भिल्लानुएभाले अमेरिका र विश्वभर अमेरिकी हितलाई लक्ष्य बनाउने आतंकवादी समूहलाई समर्थन र समर्थन गरेको आरोप लागेको छ” ।
यसै वर्षको सुरुवातमा मिशिगन राज्यको आर्मी नेशनल गार्डका पूर्व सदस्य १९ वर्षीय अमार अब्दुलमजिद मोहम्मद सईदलाई पनि गिरफ्तार गरिएको थियो ।
उनमा अमेरिकी सैनिक बेसमा सामूहिक गोलीकाण्ड गर्ने योजना बनाएको आरोप लागेको छ ।