एसाइलमका दाबीहरु अन्त्य गरेर देश निकालाको गति बढाउने ट्रम्प प्रशासनको नयाँ योजना
प्रकाशित मिति : असार ११, २०८२ बुधबार
ट्रम्प प्रशासनले अमेरिकामा लाखौं आप्रवासीहरूको एसाइलम दाबी खारेज गर्ने र उनीहरुलाई तुरुन्तै देश निकाला गर्न सकिने बनाउने योजना बनाइरहेको खुलासा भएको छ ।
यो अमेरिकामा आप्रवासीहरूलाई सुरक्षा प्राप्त गर्नबाट रोक्न प्रशासनले चालेका कदमहरूको श्रृंखलाको पछिल्लो कडी हो। संघीय अधिकारीहरू गिरफ्तारी संख्याहरू बढाउन दबाबमा परेपछि ट्रम्प प्रशासनका अधिकारीहरूले चुपचाप धेरै मानिसहरूलाई देशनिकाला योग्य बनाउने प्रयासहरूमा काम गरिरहेका छन्।
नयाँ योजनामा लक्षित व्यक्तिहरू विनाभिसा गैरकानूनी रूपमा अमेरिका प्रवेश गरेर एसाइलमका लागि आवेदन दिएकाहरु रहेको जनाइएको छ । उनीहरूको मुद्दा बन्द गरेर उनीहरूलाई देश निकाला गर्ने योजना ट्रम्प प्रशासनको छ । यसले हजारौं नेपालीहरुसहित लाखौं एसाइलम आवेदकहरूलाई असर गर्न सक्छ।
किनभने बाइडेन प्रशासनको बेलामा मात्रै झण्ढै ९ हजार नेपालीहरु विनाभिसा अमेरिका प्रवेश गर्ने क्रममा सीबीपीबाट पक्राउ परेका थिए । उनीहरुमध्ये अधिकांश एसाइलमका मुद्दाहरु अदालतमा विचाराधिन रहेका छन् । अहिले झण्डै १० हजार नेपालीहरुका मुद्दा अध्यागमन अदालतमा विचाराधिन रहेका छन् ।
पछिल्लो दशकमा युएससीआईएसमा एसाइलमका लागि आवेदन दिनेमध्ये लगभग २५ प्रतिशतले आफू विनाभिसा गैरकानूनी रूपमा अमेरिका प्रवेश गरेको बताएका थिए । २०२३ मा शरणार्थीहरूको विश्लेषण गर्ने संघीय प्रतिवेदन अनुसार यो कम्तिमा साढे २ लाख मानिसहरू बराबर हो। अरूहरू विभिन्न भिसाहरू मार्फत पोर्ट अफ इन्ट्रीबाट कानुनी रूपमा प्रवेश गरेका थिए।
अमेरिकी कानून अन्तर्गत आफ्नो देशमा हिंसा वा उत्पीडनबाट सुरक्षा खोजिरहेका व्यक्तिहरूले अमेरिकामा रहन शरण दाबी गर्न सक्छन्। ट्रम्पले पदभार ग्रहण गरेपछि अमेरिकाको दक्षिणी सिमानामा शरण दाबी गर्ने पहुँचलाई प्रभावकारी रूपमा बन्द गरिसकेका छन् ।
संघीय तथ्याङ्क अनुशार हाल लगभग १४ लाख ५० हजार मानिसहरूका एसाइलम आवेदनहरू युएससीआईएसमा विचाराधीन छन्। त्यसमध्ये झण्डै ५ हजार नेपालीहरु रहेको अनुमान गरिएको छ । देशनिकालाको प्रक्रियामा नभएका व्यक्तिहरूले युएससीआईएसमार्फत एसाइलमका लागि आवेदन दिन सक्छन्।
तर डिपार्टमेन्ट अफ होमल्याण्ढ सेक्युरिटी सेक्रेटरी क्रिस्टी नोएमले ती व्यक्तिहरूलाई द्रुत देशनिकालाको कार्यवाहीमा राख्ने र अध्यागमन कानूनको नागरिक तथा फौजदारी उल्लङ्घन लागू गर्न थप कारबाही गर्ने अधिकार पनि युएससीआईएसलाई प्रत्यायोजित गरेकी छिन्। यो युएससीआईएसको दशकौं लामो प्रोटोकलमा आएको परिवर्तन हो ।
सामान्यतया युएससीआईएसले मानिसहरूलाई अमेरिकामा एसाइलमका लागि योग्य नभएको निर्धारण गरेमा अध्यागमन प्रक्रियाको अर्को चरणको लागि आइसलाई सुम्पन सक्छ। तीब्र गतिको देशनिकालाका कार्यहरू सामान्यतया आईस र सीबीपीको अधिकार अन्तर्गत पर्छन् । राष्ट्रपतिको देशनिकालाको अभियानको केन्द्रमा युएससीआईएसलाई राख्दा राहत प्राप्त गर्न र अमेरिकामा रहन खोज्नेहरूका लागि नकारात्मक प्रभाव पर्ने सम्भावना रहेको छ ।
प्रशासनको नयाँ योजना अन्तर्गत युएससीआईएसमा एसाइलम अस्वीकृत भएका आप्रवासीहरूलाई द्रुत रूपमा देश निकालाको अधीनमा राखिनेछ। त्यो द्रुत देशनिकालाको प्रक्रियाले अध्यागमन अधिकारीहरूलाई अध्यागमन न्यायाधीश समक्ष सुनुवाइ बिना नै व्यक्तिलाई देशनिकाला गर्न अनुमति दिनेछ ।
ट्रम्प प्रशासनका अधिकारीहरूले यस वर्षको सुरुमा अमेरिकामा लगातार दुई वर्ष वा सोभन्दा बढी समयदेखि बसोबास गरेको प्रमाणित गर्न नसक्ने कागजात नभएका आप्रवासीहरूलाई अदालतमा पेश नगरी तीब्र गतिमा देश निकाला विस्तार गरेका थिए । प्रशासनले पहिले नै अध्यागमन न्यायाधीशहरूलाई कानूनी रूपमा कमजोर एसाइलमका मुद्दाहरू सुनुवाई विना नै खारेज गर्न भनेको थियो।
वर्षौंदेखि अमेरिकामा बसोबास र काम गर्दै आएका केही आप्रवासीहरूले आफ्नो एसाइलम आवेदनहरू निर्णय बिना नै खारेज गरिएको सूचनाहरू प्राप्त गरिसकेका छन्। कति जनाले खारेजीको सूचना प्राप्त गरेका छन् भन्ने स्पष्ट छैन। ट्रम्प प्रशासनले अमेरिकामा आप्रवासीहरूलाई अस्थायी रूपमा सुरक्षा दिन डिजाइन गरिएका धेरै कार्यक्रमहरूलाई लक्षित गरेपनि युएससीआईएसले पहिले आवेदन स्वीकार गरेर पछि अचानक खारेज गर्नु असामान्य हो।