हार्वर्ड विश्वविद्यालयसँग सहमति हुनसक्ने राष्ट्रपति ट्रम्पको संकेत
प्रकाशित मिति : असार ६, २०८२ शुक्रबार
अमेरिकी राष्ट्रपति डोनाल्ड ट्रम्पले हार्वर्ड विश्वविद्यालय र ह्वाइट हाउसबीच सहमतिको हुनसक्ने बताएका छन । आफ्नो सामाजिक सञ्जाल ट्रुथ सोसल मा उनले सक्रिय वार्ता भइरहेको दावी गरेका छन् ।
उनले संभावित सहमतिबारे “आगामी एक हप्ताभित्र” घोषणा हुन सक्ने जनाएका छन् । ट्रम्पले कुनै प्रमाण प्रस्तुत नगरी वार्ताको दावी गरे पनि उनले हार्वर्डको आचरणको भने प्रशंसा गरेका छन ।
उनले लेखे, “यी वार्ताहरूको क्रममा हार्वर्डले अत्यन्त जिम्मेवारीपूर्वक व्यवहार गरेको छ र सही कदम चाल्ने प्रतिबद्ध देखिएको छ।”
यो वार्ता विश्वविद्यालयको संघीय सरकारविरुद्ध दायर दुई मुद्दामध्ये कुनै एकसँग सम्बन्धित छ वा ट्रम्प प्रशासनको विभिन्न मागहरूसँग गैर औपचारिक रूपमा जोडिएको हो भनेर उनले कुनै विषयमा जानकारी दिएका छैनन ।
हार्वर्डका प्रवक्ताहरूले ट्रम्पको टिप्पणीबारे अहिलेसम्म कुनै प्रतिक्रिया दिएका छैनन् । मार्च महिनादेखि ट्रम्प प्रशासनले हार्वर्ड विश्वविद्यालयमा विदेशी सहयोग, आन्तरिक अनुशासन प्रक्रिया, र कोष व्यवस्थापन सम्बन्धी विभिन्न अनुसन्धान सुरु गरेको छ ।
अनुसन्धानमार्फत प्रशासनले विश्वविद्यालयलाई शासकीय संरचना फेरबदल गर्न, विदेशी सरकारहरूसँगको सम्बन्ध तोड्न, र प्यालेस्टाइन समर्थन प्रदर्शनहरूमा भाग लिने विद्यार्थीहरूविरुद्ध कडा कदम चाल्न दबाव दिँदै आएको छ ।
ट्रम्प र उनका अधिकारीहरूले हार्वर्डमाथि यहूदी विरोधी दृष्टिकोण बढाएको, श्वेत, एशियाली र पुरुष विद्यार्थी तथा कामदारहरूमाथि विभेद गरेको आरोप लगाउँदै आएका छन् ।
साथै, हार्वर्डको ५३ बिलियन डलरको कोष लाई औंल्याउँदै विश्वविद्यालयले संघीय अनुसन्धान कोषमा निर्भर हुनु नपर्ने बताएका छन् ।
हालैका हप्ताहरूमा हार्वर्डले केहि आन्तरिक परिवर्तनहरू गरेको छ । यी परिवर्तनहरुलाई वाशिंगटनसँगको तनाव घटाउने प्रयासको रूपमा हेरिएको छ ।