संघीय कर्मचारीले कामको औचित्य प्रमाणित नगरे जागिर गुमाउनुपर्ने मस्कको चेतावनी
प्रकाशित मिति : फाल्गुन ११, २०८१ आईतबार
अमेरिकी राष्ट्रपति डोनाल्ड ट्रम्पका अर्बपति सल्लाहकार एलन मस्कले अमेरिकी सङ्घीय निकायका सबै कर्मचारीले आफ्नो कामको औचित्य पुष्टि गर्न आग्रह गरेका छन । उनले औचित्य पुष्टि नगरे जागिर गुमाउनुपर्ने चेतावनी दिएका छन ।
विश्वका सबैभन्दा धनी व्यक्ति तथा ट्रम्पका सबैभन्दा ठूला दाता मस्कले अनावश्यक सरकारी कर्मचारीलाई बिदा गर्ने प्रयासको नेतृत्व गरिरहेका छन ।
सबै सङ्घीय कर्मचारीहरूले चाँडै इमेल प्राप्त गर्ने र इमेललाई जवाफ दिन असफल भएमा त्यसलाई राजीनामाको रुपमा लिइने मस्कले वताएका हुन ।
सबैभन्दा ठूलो सङ्घीय कर्मचारी युनियन, ‘अमेरिकन फेडेरेसन अफ गभर्नमेन्ट एम्प्लोइज (एएफजीई)’ का राष्ट्रिय अध्यक्ष एभरेट केलीले कुनै पनि गैरकानुनी बर्खास्तीलाई चुनौती दिने प्रतिबद्धता जनाएका छन ।
केलीले मस्क र ट्रम्प प्रशासनको आलोचना गर्दै यो कदमले “सङ्घीय कर्मचारीहरू र उनीहरूले अमेरिकी जनतालाई प्रदान गर्ने महत्वपूर्ण सेवाहरूप्रतिको घोर अपमान’ भएको बताए ।