क्यानडाले यो बर्ष विद्यार्थी भिसा अझ घटाउने, ४ लाख ३७ हजारमा सिमित गर्ने लक्ष्य
क्यानडाले लगातार दोस्रो वर्ष २०२५ मा अन्तर्राष्ट्रिय विद्यार्थीको संख्यामा सीमितता लगाउने भएको छ, जसअनुसार सरकारले आवास, स्वास्थ्य सेवा तथा अन्य सेवाहरूमा पर्ने दबाब कम गर्ने प्रयास जारी राखेको छ।
क्यानडाले यस वर्ष ४३७,००० विद्यार्थी भिसा जारी गर्नेछ, जुन २०२४ को तुलनामा १० प्रतिशत कम रहेको आप्रवासन मन्त्रालयले शुक्रबार जारी गरेको विज्ञप्तिमा उल्लेख गरिएको छ।
देशले २०२४ मा नयाँ अन्तर्राष्ट्रिय विद्यार्थी अनुमतिमा सीमितता लागू गरेको थियो, किनभने पछिल्ला वर्षहरूमा भएको जनसंख्या वृद्धिले आवास अभावलाई झन् चर्काएको देखिएको थियो। प्रधानमन्त्री जस्टिन ट्रुडोले हालै मार्चमा राजीनामा दिने घोषणा गरेका छन्। उनले पछिल्ला महिनाहरूमा आप्रवासन स्तर घटाउने प्रतिज्ञा गरेका थिए, किनभने सर्वेक्षणहरूले क्यानडामा नयाँ आप्रवासीहरूप्रति समर्थन कम हुँदै गएको देखाएको थियो।
सरकारी तथ्यांकअनुसार २०२३ मा क्यानडाले ६५०,००० भन्दा बढी विद्यार्थी भिसा जारी गरेको थियो, जसले गर्दा देशभित्र रहेका अन्तर्राष्ट्रिय विद्यार्थीहरूको संख्या ऐतिहासिक रूपमा एक मिलियन नाघ्यो। यो संख्या एक दशकअघि प्रवेश गर्ने विद्यार्थीहरूको झन्डै तीन गुणा हो।
सन् २०२२ मा ८ लाख विदेशी विद्यार्थीहरु क्यानडामा अध्ययनरत थिए, जुन संख्या एक दशक अगाडि २ लाख १४ हजारमात्र रहेको थियो । २०२४ मा क्यानडाले स्नातक अध्ययनका लागि करिब ३ लाख ६० हजार भिसा अनुमति स्वीकृत गर्ने लक्ष्य राखेको थियो । जुन २०२३ को तुलनामा ३५ प्रतिशत कम हो ।
आप्रवासनका कारण भएको तीव्र जनसंख्या वृद्धिले स्वास्थ्य सेवा, शिक्षा जस्ता सेवाहरूमा दबाब सिर्जना गरेको छ र आवास खर्च वृद्धि गर्नसमेत भूमिका खेलेको छ।यद्यपि, अन्तर्राष्ट्रिय विद्यार्थीहरूले स्वदेशी विद्यार्थीहरूभन्दा निकै उच्च शुल्क तिर्ने गर्छन्, जसले शैक्षिक संस्थाहरूलाई ठूलो आर्थिक योगदान गदैै आएको छ ।
पछिल्लो वर्ष लागू गरिएको अन्तर्राष्ट्रिय विद्यार्थी सीमितताको प्रतिक्रियास्वरूप, अधिकांश अध्ययन अनुमति आवेदनकर्ताहरूले अब प्रान्तीय वा क्षेत्रीय प्रमाणपत्र पत्र बुझाउनुपर्नेछ। यस वर्षदेखि मास्टर र पोस्ट डाक्टोरल विद्यार्थीहरूलाई समेत यस्तो पत्र आवश्यक पर्नेछ।
यी प्रमाणपत्र पत्रहरूले विद्यार्थीहरूलाई संघीय सरकारको अन्तर्राष्ट्रिय विद्यार्थी सीमितता अन्तर्गत समावेश गरिएको पुष्टि गर्नका लागि आवश्यक पर्नेछ।
