अमेरिकामा साउदी अरेबियाले ६०० अर्ब डलर लगानी गर्ने
प्रकाशित मिति : माघ ९, २०८१ बुधबार
साउदी अरबले अमेरिकामा ६०० अर्ब डलर लगानी गर्ने तयारी गरेको छ । तर यो लगानी कुन क्षेत्रमा हो त्यो भने बताएको छैन ।
अमेरिकी राष्ट्रपति डोनाल्ड ट्रम्पले साउदी अरबका क्राउन प्रिन्स मोहम्मद बिन सलमानसँग गरेको टेलिफोन वार्ताका क्रममा प्रिन्सले यो जानकारी दिएका हुन ।
यो लगानी आगामी ४ बर्षभित्र हुने बताइएको छ । ट्रम्पको अमेरिकामा राष्ट्रपतिको रुपमा ४ बर्षे कार्यकाल हुनेछ ।
साउदी सरकारले जारी गरेको विज्ञप्ति अनुसार बिन सलमानले ट्रम्पलाई बधाई दिदै उनको नेतृत्वमा अमेरिकी जनताले प्रगति र समृद्धि हासिल गर्ने कामना व्यक्त गरेका छन् ।
वार्ताका क्रममा मध्यपूर्वमा स्थिरता र आतंकवादविरुद्धका प्रयासहरूबारे मा पनि छलफल भएको छ ।
बिन सलमानले ट्रम्पको ‘अभूतपूर्व आर्थिक समृद्धि र अवसर सिर्जना गर्ने क्षमता’को प्रशंसा गर्दै साउदी अरेबिया अमेरिकामा विभिन्न पहलहरूमा सहकार्य गर्न र लगानी गर्न इच्छुक रहेको बताएका हुन ।
ट्रम्पले बिन सलमानप्रति आफ्नो कृतज्ञता व्यक्त गरेको र दुवै देशको हितका लागि सहकार्य गर्ने आफ्नो प्रतिबद्धता दोहोर्याएको साउदी अरेबियाले जनाएको छ ।