अमेरिकामा हिमपात र चिसोले चारजनाको ज्यान गयो , आवश्यक सर्तकता अपनाउन मौसमविदको सुझाव
प्रकाशित मिति : माघ ९, २०८१ बुधबार
अमेरिकामा चिसोबाट कम्तीमा चारजनाको ज्यान गएको छ । अस्टिनमा दुईजना , जर्जियामा १ जना र मिल्वाकीमा १ जनाको मृत्यु चिसोका कारण भएको आशंका गरिएको छ ।
अमेरिकाको अधिकांश क्षेत्रमा अत्यधिक चिसोले जनजीवन प्रभावित बनाएको छ । यस हिउँदे आँधीले गल्फ कोस्ट क्षेत्रमा ठूलो असर पारेको छ ।
हिउँ प्रायः नदेखिने क्षेत्रमा अहिले हिमपातका कारण अनौठा दृश्यहरू देखिएका छन् । दक्षिणपूर्व टेक्सस, लुइजियाना, मिसिसिपी र अलाबामामा व्यापक हिमपात भएको छ ।
न्युलिन्सको लुइस आर्मस्ट्रङ अन्तर्राष्ट्रिय विमानस्थलमा मंगलबार ८ इन्च हिमपात मापन गरिएको थियो । जुन १९६३ को २.७ इन्चको कीर्तिमानभन्दा धेरै हो ।
फ्लोरिडाको मोलिनोमा ५.५ इन्च हिमपात मापन भएको छ । जसले १९५४ को कीर्तिमान तोडेको छ । लुइजियाना र टेक्ससको केही भागमा पहिलो पटक हिम आँधीको चेतावनी जारी गरिएको छ ।
दक्षिणका विभिन्न विमानस्थल बन्द छन् । मंगलबार मात्र २ हजार ३०० भन्दा बढी उडान रद्द भएका थिए । लुइजियाना, जोर्जिया, अलाबामा, फ्लोरिडा र मिसिसिपीमा विद्यालय र सरकारी कार्यालयहरू बन्द भएका छन्।
क्यानडाको सीमा देखि मेक्सिको सीमासम्म चिसोका कारण जनजीवन प्रभावित भएको छ । टेक्ससको उत्तरी भागमा चिसोले तापक्रम एकल अंकमा झारिदिएको छ ।
लुइजियानाका जलवायुविद् जय ग्राइम्सका अनुसार, धेरैले यस्तो चिसो र हिमपात कहिल्यै अनुभव गरेका थिएनन ।
प्रभावित राज्यका अधिकारीहरूले जनतालाई यात्रा नगर्न, नल सानो खोलेर राख्न, धुवाँ र कार्बन मोनोअक्साइड डिटेक्टरको जाँच गर्न र घर तताउन चुलो प्रयोग नगर्न सुझाव दिएका छन् ।