अमेरिकाको क्यालिफोर्नियामा विमान घरमा ठोक्कियो, २ जनाको मृत्यु , १८ घाइते
प्रकाशित मिति : पुस १८, २०८१ बिहीबार
अमेरिकाको दक्षिण क्यालिफोर्नियामा भएको विमान दुर्घटनामा २ जनाको मृत्यु भएको छ । अन्य १८ जना घाइते भएका छन ।
एक व्यापारिक भवनमा सानो विमान ठोक्किएपछि २ जनाको मृत्यु भएको र अन्य १८ जना घाइते भएका हुन ।
फुलर्टन प्रहरी विभागले १० जनालाई घाइते अवस्थामा अस्पताल पुर्याइएको बताएको छ ।
अन्य अन्य आठ जनालाई घटनास्थलमै उपचार गरी डिस्चार्ज गरिएको बिभागले बताएको छ ।
फेडरल एभिएसन एड्मिनिस्ट्रेसन का अनुसार भ्यान्स आरभी १० मोडलको एक इञ्जिन भएको उक्त विमान दुर्घटनाग्रस्त भएको थियो ।
अधिकारीहरूले दुर्घटनाको कारणबारे थप जानकारी दिएका छैनन् ।
दुई जना मृतकहरू भवनभित्र कार्यरत थिए वा विमानभित्र सवार थिए भन्नेबारे प्रस्ट भइसकेको छैन । प्रहरीले सर्वसाधारणलाई दुर्घटनास्थलबाट टाढा रहन आग्रह गरेको छ ।
ठोक्किएको भवन फर्निचर निर्माण कारखाना हो । घटनास्थलका हवाई तस्वीरहरूले विमानका केही भाग भवनभित्र रहेको देखाएको छ ।
दुर्घटनापछि लागेको आगो दमकल टोलीले निभाएको छ । छेउको भवनमा रहेको सुरक्षा क्यामेराले रेकर्ड गरेको फुटेजमा विस्फोट भएको देखिन्छ ।
दुर्घटना फुलर्टन नगरपालिका विमानस्थलको नजिकै भएको हो । जुन डिज्नील्यान्डबाट १० किलोमिटर टाढा छ ।
विमानले उडान भरेपछि केही समयमै विमानस्थलतर्फ फर्कने प्रयास गरिरहेको बताइएको छ ।
यो पछिल्ला दुई महिनामा सो क्षेत्रमा भएको दोस्रो विमान दुर्घटना हो ।
नोभेम्बर २५ मा अर्को विमान नजिकैको रूखमा ठोक्किएको थियो । तर उक्त दुर्घटनामा ठूलो क्षति भने भएको थिएन ।