ट्रम्पका कट्टर आलोचक चेनीलाई राष्ट्रपति बाइडेनले सम्मान गर्ने
प्रकाशित मिति : पुस १८, २०८१ बिहीबार
President Joe Biden smiles as he meets with NATO Secretary General Jens Stoltenberg in the Oval Office at the White House, Monday, June 17, 2024. (AP Photo/Mark Schiefelbein)
अमेरिकी राष्ट्रपति जो बाइडनले पूर्व रिपब्लिकन सांसद तथा डोनाल्ड ट्रम्पका कट्टर आलोचक लिज चेनीलाई नागरिक सेवा पदक प्रदान गर्ने घोषणा गरेका छन ।
वायोमिङका पूर्व प्रतिनिधिसहित अन्य १९ जना प्रतिष्ठित व्यक्तित्वलाई आफ्नो देश वा आफ्ना नागरिकका लागि अनुकरणीय सेवाका लागि राष्ट्रपति नागरिक पदकप्रदान गरिनेछ ह्वाइट हाउसले जारी गरेको विज्ञप्तिमा भनिएको छ ।
सन् २०२१ को जनवरी ६ मा भएको क्यापिटल दङ्गामा ट्रम्पको भूमिकाको छानबिन गर्ने हाउस कमिटीको अध्यक्षता गरेका पूर्व अमेरिकी सिनेटर क्रिस डोड, पूर्व अमेरिकी प्रतिनिधि क्यारोलिन म्याकार्थी र वर्तमान सांसद बेन्नी थम्पसनलाई पनि अमेरिकी सरकारले प्रदान गर्ने दोस्रो सर्वोच्च नागरिक सम्मान प्रदान गरिने भएको हो ।
पूर्व उपराष्ट्रपति डिक चेनीकी छोरी चेनीले समितिको उपाध्यक्षको रूपमा काम गरेकी थिइन । ५८ वर्षीया चेनी हालैका वर्षहरूमा रिपब्लिकन पार्टीमा ट्रम्प विरोधी आवाज बनेकी छन ।
तर सन् २०२२ मा ट्रम्प समर्थक उम्मेदवारसँग उनले संसद्का लागि आफ्नो सिट गुमाउनु परेको थियो ।
उनले गत नोभेम्बरमा डेमोक्र्याटिक पार्टीका तर्फबाट राष्ट्रपतिपदका उम्मेदवार उपराष्ट्रपति कमला ह्यारिससँग चुनावी अभियानमा सहभागिता जनाएकी थिइन ।
जनवरी २० मा ह्वाइट हाउसमा राष्ट्रपतिको दोस्रो कार्यकालको सपथ लिने तयारीमा रहेका ट्रम्पले आफ्ना राजनीतिक प्रतिद्वन्द्वी चेनीसँग बदला लिने बताएका छन ।
गत डिसेम्बरमा रिपब्लिकन नेतृत्वको संसदीय समितिले चेनीमाथि ट्रम्प समर्थकले क्यापिटलमा गरेको आक्रमणको अनुसन्धानको नेतृत्व गर्न सहयोग गर्दा साक्षीसँग छेडछाड गरेको आरोप लगाएको थियो । उनले उक्त आरोपको खण्डन गरेकी छन ।