इरान समर्थित समूहमाथि कडा कारवाही सुरु गर्न इराकलाई अमेरिकाको दबाब
प्रकाशित मिति : मंसिर २९, २०८१ शनिबार
अमेरिकी विदेशमन्त्री एन्टोनी ब्लिन्केनले इरान समर्थित मिलिसियामाथि कडा कारबाही गर्न इराकलाई दबाब दिनुभएको छ ।
सिरियाली नेता बसर अल असदको पतनपछि तेहरान कमजोर अवस्थामा पुगेको मुल्याङ्कन गर्दै अमेरिकी विदेशमन्त्री ब्लिन्केनले इरान समर्थित मिलिसियामाथि कडा कारबाही सुरू गर्न प्रोत्साहन गरेको उहाँले बताउनु भयो ।
ब्लिन्केनले इराकी प्रधानमन्त्री मोहम्मद शिया अल सुडानीसँग बग्दादमा भेटवार्ता गर्नुभएको थियो । अमेरिकी अधिकारीका अनुसार ब्लिन्केनले सुडानीलाई इरान केही समययता कमजोर अवस्थामा रहेको र इराकसँग तेहरानको प्रभाव कम गर्ने अवसर रहेको बताउनुभएको थियो ।
ब्लिन्केनले सुडानीलाई वर्षौंदेखि इराकमा अमेरिकी सेनामाथि आक्रमण गर्दै आएको इरान समर्थित शिया सशस्त्र समूहमाथि कडा कारबाही गर्न आग्रह गर्नुभएको थियो ।
ब्लिन्केनले सुडानीलाई इराकी भूमिबाट सिरियामा रहेका कुनै पनि सम्बद्ध समूहलाई इरानी हतियार हस्तान्तरण हुन नदिन सहयोग गर्न पनि आग्रह गर्नुभएको छ ।
सिरियामा लामो समयदेखि असदको सरकारले इरान र लेबनानमा उसको शक्तिशाली सहयोगी हिजबुल्लाहको सहयोगमा शक्ति आर्जन गरेको थियो ।
तेहरान समर्थित समूहले इजरायलसँगको हालैको युद्धमा ठूलो क्षति व्यहोरेको छ । यसले सिरियामा इरानसँग सम्बन्धित लक्ष्यहरूमा पनि आक्रमण गरेको छ।
सिरियाको अर्को प्रमुख समर्थक रूसले भने युक्रेनमा जारी युद्धका कारण असदको प्रशासनलाई सहयोग गर्न असफल भएको देखिन्छ ।
अमेरिकी अधिकारीले ब्लिन्केनको अनुरोधमा सुडानीले कस्तो प्रतिक्रिया देखाए भन्नेबारे जानकारी भने दिन अस्वीकार गरेका थिए ।
इराकी सरकारको इरानसँग घनिष्ठ सम्बन्ध छ । अमेरिकी राष्ट्रपति जो बाइडेन प्रशासन बग्दादसँग इराकमा अमेरिकी सेनाको बाँकी उपस्थिति घटाउन सहमत भएको छ ।
अमेरिकी राष्ट्रपति डोनाल्ड ट्रम्पको आगामी प्रशासनले इरानविरुद्ध अमेरिकी कदमलाई कडा बनाउने अपेक्षा गरिएको छ ।
यद्यपि, नवनिर्वाचित राष्ट्रपति डोनाल्ड ट्रम्पले पनि सम्झौता गर्ने इच्छा व्यक्त गर्नुभएको छ । बाइडेन प्रशासनले गत महिना इराकलाई प्रतिबन्धका बावजुद इरानबाट बिजुली खरिद गर्न अनुमति दिएको थियो ।