ट्रम्पको धम्कीपछि क्यानडाले सीमा सुरक्षालाई बलियो बनाउदै
प्रकाशित मिति : मंसिर १३, २०८१ बिहीबार
क्यानडाका प्रधानमन्त्री जस्टिन ट्रुडोले अमेरिकी राष्ट्रपति डोनाल्ड ट्रम्पको धम्कीपछि सीमा सुरक्षा बलियो बनाउन थप लगानी गर्ने घोषणा गर्नुभएको छ ।
ट्रम्पले मेक्सिको र क्यानडाबाट हुने अवैध आप्रवासन र लागूऔषध तस्करीलाई रोक्नका लागि क्यानडाका सबै उत्पादनहरूमा २५ प्रतिशत भन्सार कर लगाउने चेतावनी दिनुभएको थियो ।
उहाँले जबसम्म फेन्टानिललगायत लागूऔषध र अवैध आप्रवासीहरूको ‘आक्रमण’ रोकिँदैन तबसम्म यो कर कायम रहने बताउनु भएको हो ।
ट्रम्पको चेतावनीपछि ट्रुडोले क्यानडाका प्रान्तीय नेताहरूको बैठक गर्नुभएको छ । बैठकपछि क्यानडाका सार्वजनिक सुरक्षा मन्त्री डोमिनिक लेब्लाङ्कले भन्नुभएको छ क्यानडालीलाई आश्वस्त पार्नका लागि आवश्यक सबै उपायहरू लागू गरिने सुनिश्चित गर्न थप लगानी गर्नेछौं । यद्यपि, उहाँले कति रकम थप छुट्याइने हो भन्ने खुलाउनु भएन ।
सीमामा मुख्य चुनौतीहरू
क्यानडा–अमेरिका सीमा विश्वकै लामो हो । यो करिब ९ हजार किलोमिटरमा फैलिएको छ । यो सीमा कम रूपमा सुरक्षित मानिन्छ । केही ठूला सडक क्रसिङ बिन्दुहरूमा मात्र जाँचपोस्टहरू राखिएका छन्।
सीमाका धेरै भाग मोबाइल गस्ती टोलीहरूले मात्र अनुगमन गर्छन् । जसका कारण आप्रवासी, लागूऔषध र हतियार तस्करी हुने खतरा छ ।
ट्रम्पको नयाँ सीमा सुरक्षा प्रमुख टम होमनले क्यानडा आतंकवादीहरूको अमेरिका प्रवेश गर्ने गेटवे बन्न सक्दैन भन्नुभएको थियो ।
आप्रवासनमा वृद्धि
अमेरिकी भन्सार तथा सीमा सुरक्षा तथ्यांकअनुसार, २०२१ मा क्यानडाबाट अमेरिका प्रवेश गर्न प्रयास गर्ने आप्रवासीहरूको संख्या २०२४ मा १ लाख ९८ हजार ९२९ पुगेको छ । सन २०२१ मा यो संख्या २७ हजार १८० थियो । यो संख्या करिब ६०० प्रतिशतको वृद्धि हो।
क्यानडाका प्रान्तीय नेताहरूले सीमाको सुरक्षा प्राथमिकतामा नराखेको भन्दै सरकारको आलोचना गरेका छन् ।
ओन्टारियोका प्रिमियर डग फोर्डले ट्रम्पको भन्सार करका कारण आर्थिक अराजकताबाट बच्न संघीय सरकारले अब सीमा सुरक्षालाई गम्भीरतापूर्वक लिनुपर्ने बताउनु भयो ।
सीमामा थप जनशक्तिको आवश्यकता
क्यानडाको सीमा सुरक्षा एजेन्सीका ८ हजार ५०० कर्मचारीले दैनिक करिब ४ लाख मानिस र ३ दशमलव ६ अर्ब क्यानेडियन डलर बराबरको सामानको निगरानी गर्छन् ।
तर, युनियनका अनुसार, २ हजार देखि ३ हजार थप कर्मचारी आवश्यक छ । सीमामा जनशक्तिको अभावबारे वर्षौंदेखि आवाज उठिरहेको छ तर सरकारले सुनिरहेको छैन ।
लागूऔषधका तथ्यांकहरू
ट्रम्पले क्यानडाबाट लागूऔषध अमेरिका प्रवेश गर्ने आरोप लगाए पनि तथ्यांकले भने त्यस्तो देखाउदैन ।
अमेरिकी तथ्यांकअनुसार, २०२२ देखि २०२४ सम्म अमेरिकी–मेक्सिको सीमामा मासिक औसत ८२१ किलो फेन्टानिल जफत भएको छ । तर क्यानडा–अमेरिका सीमामा यो संख्या मासिक ८०० ग्राम मात्र छ ।
क्यानडाको चासो
क्यानडा पनि सीमा सुरक्षा बारे चिन्तित छ । ट्रम्पले आगामी वर्ष राष्ट्रपति पद सम्हालेपछि अनाधिकृत आप्रवासीहरूलाई देशनिकाला गर्ने प्रतिबद्धता व्यक्त गर्नुभएको थियो ।
आप्रवासीहरू अमेरिकी अध्यागमन अधिकारीहरूबाट बच्न क्यानडाको उत्तरतर्फ आउने प्रयास गर्नसक्ने सरकारी अधिकारीले आशंका गरेका छन ।