रुस युक्रेन युद्धको अन्त्य गर्ने घोषणा गरेका ट्रम्पले केलोगलाई विशेष दूत नियुक्त गर्ने
प्रकाशित मिति : मंसिर १२, २०८१ बुधबार
Republican presidential nominee former President Donald Trump arrives to speak during a campaign event at the World Market Center, Friday, Sept.13, 2024, in Las Vegas. (AP Photo/John Locher)
अमेरिकाका नव निर्वाचित राष्ट्रपति डोनाल्ड ट्रम्पले कीथ केलोगलाई रूस युक्रेन मामिलामा विशेष दूत नियुक्त गर्ने घोषणा गर्नुभएको छ ।
ट्रम्पले पूर्व राष्ट्रिय सुरक्षा सल्लाहकार तथा अवकाशप्राप्त लेफ्टिनेन्ट जनरल केलोगलाई रूस युक्रेन युद्धसम्बन्धी मामिलामा विशेष दूतको रूपमा नियुक्त गर्ने घोषणा गर्नुभएको हो ।
युक्रेनमा जारी युद्ध अन्त्य गर्न हुने वार्ताहरूमा केलोगले मुख्य भूमिका निर्वाह गर्ने अपेक्षा गरिएको छ ।
राष्ट्रपतिको कार्यभार सम्हाल्ने पहिलो दिनमै ट्रम्पले यो युद्ध अन्त्य गराउने प्रतिबद्धता जनाउनु भएको छ । यद्यपि, उहाँले यसबारे थप विवरण दिनुभएको छैन ।
रूस र युक्रेनसँग कडा वार्ता गरेर युद्ध अन्त्य गराउने नीतिका समर्थक रहेका केलोगले यसअघि अमेरिका फर्स्ट पॉलिसी इन्स्टिट्युट नामक ट्रम्प समर्थक थिंक ट्यांकद्वारा प्रकाशित अनुसन्धान पत्रमा सहलेखन गर्नुभएको थियो ।
उक्त पत्रमा उहाँले युद्ध अन्त्य गर्नका लागि केही सुझाव समेत दिनुभएको छ । यो महिनाको सुरूमा एक अन्तर्वार्ताको क्रममा केलोगले ट्रम्पको दोस्रो कार्यकालमा युद्ध अन्त्य गर्नु नै सबैभन्दा ठूलो चुनौती हुनेछ भन्नुभएको थियो ।
युक्रेनमाथि रूससँग शान्ति वार्तामा सहभागी हुन दबाब दिनुपर्छ । त्यसका आधारमा अमेरिकाले युक्रेनलाई सहयोग जारी राख्नुपर्छ ।
तर, रुस शान्ति वार्तामा सामेल हुन अस्वीकार गर्छ भने अमेरिकाले युक्रेनलाई थप सहायता दिनुपर्ने बताउनु भएको छ ।