अमेरिकामा २ बालिका हत्याका आरोपीलाई १३० बर्ष जेल सजाय सुनाउने तयारी
प्रकाशित मिति : कार्तिक २७, २०८१ मंगलबार
अमेरिकाको इन्डियाना राज्यमा दुई बालिकाको हत्या आरोपमा एकजनालाई दोषी ठहर गरेको छ । त्यहाँको एक जूरीले २०१७ मा डेल्फीमा हराएका दुई किशोरीहरूको हत्या आरोपमा रिचर्ड एलेनलाई दोषी ठहर गरेको हो ।
सात महिला र पाँच पुरुषको जूरीले ३ दिनमा करिब १९ घण्टा छलफल गरेपछि ५२ वर्षीय एलेनलाई १४ वर्षीया लिब्बी भनिने लिबर्टी जर्मन र १३ वर्षीया एबिगेल विलियम्सको हत्या आरोपमा दोषी ठहर गरेको हो ।
निर्णय घोषणा हुँदा एलेन शान्त रहेर आफ्नो बाइबल बोकेर बसेका थिए । उनले कुनै प्रतिक्रिया देखाएनन् । तर पछि आफ्नो परिवारतर्फ फर्केर तिमीहरू ठीक छौ भनेर सोधे जस्तो देखिन्थ्यो।
एलेनलाई डिसेम्बर २० मा सजाय सुनाउने मिति तय गरिएको छ । जहाँ उनलाई अधिकतम १३० वर्षको जेल सजाय हुन सक्नेछ ।
लामो सुनुवाइपछि मुद्दा जूरीमा पुगेको थियो । अभियोजकले बताए अनुसार एलेनले व्यक्ति, फोन, र लेखनमार्फत बारम्बार हत्या स्वीकार गरेका छन ।
एउटा रेकर्डमा एलेनले आफ्नी श्रीमतीलाई मैले गरें। मैले एबी र लिब्बीलाई मारें भनेर भनिरहेको सुन्न सकिन्थ्यो । एलेन अझै डेल्फीमा बसोबास गरिरहेका थिए र स्थानीय फार्मेसीमा काम गरिरहेका थिए ।
के हो त डेल्फी हत्याकाण्ड ?
१३ वर्षीया एबिगेल र १४ वर्षीया लिबर्टी एकअर्काका नजिकका साथीहरू थिए । जसलाई २०१७ फेब्रुअरी १३ मा डेल्फीको मोनोन हाई ब्रिज नजिकको पदमार्गमा एक आफन्तले छोडेका थिए ।
लिब्बीका बाबु उनीहरूलाई भेट्न आउनुअघि नै बेपत्ता भए । त्यस दिन अपरान्ह उनीहरू बेपत्ता भएको रिपोर्ट गरियो ।
अभियोजनका अनुसार उनीहरूलाई अन्तिमपटक देखिएको स्थानबाट लगभग एक माइल टाढा मृत अवस्थामा भेटिएको थियो । उनीहरूको घाँटी काटिएको अबस्थामा शव भेटिएको थियो ।
लिब्बीको मोबाइल फोनमा रेकर्ड गरिएको अडियोमा एउटा अपरिचित व्यक्तिले ती किशोरीहरूलाई डाँडाबाट तल जानू भनेको सुनिएको थियो ।
लिब्बीले ती व्यक्तिको छोटो भिडियो पनि खिचेकी थिइन् । यो घटना सेलाइसकेको बेला २०२२ मा एलेन पक्राउ परेका थिए ।