बाइडेन र ह्यारिस आँधी प्रभावित क्षेत्रमा , उद्धार र राहतलाई प्रभावकारी बनाउन निर्देशन
प्रकाशित मिति : आश्विन १६, २०८१ बुधबार
राष्ट्रपति जो बाइडेन र उपराष्ट्रपति कमला ह्यारिस दक्षिणपूर्वी अमेरिकी राज्यहरूमा गएको हेलिन नामक आँधीको प्रकोपले गर्दा क्षतिग्रस्त बनाएका क्षेत्रहरूमा पुग्नु भएको छ ।
यो आँधीका कारण मृत्यु हुनेको संख्या १८० पुगेको छ । बाइडेनले हेलिकप्टरमार्फत उत्तर र दक्षिण क्यारोलिनाका प्रभावित क्षेत्रहरूको अवलोकन गर्नुभएको बताइएको छ ।
आँधीका कारण सयौं व्यक्ति अझै हराइरहेका छन् । खोज र उद्धार टोलीहरूलाई दुर्गम क्षेत्रमा पुग्न कठिनाइ भइरहेको बताइएको छ ।
बाइडेनले ६ राज्यमा उद्धारको लागि खटिएका ६ हजार र नेशनल गार्ड सदस्य र ४ हजार ८ सय संघीय सहयोगकर्मीहरूको साथमा थप १ हजार सक्रिय सैनिकहरूलाई परिचालन गर्नुभएको छ ।
सहायता सामग्रीहरू हवाइ मार्गबाट र खच्चडहरूको प्रयोग गरेर वितरण गरिएको छ । अमेरिकी सरकारले यस प्रकोपको सफाइ कार्यमा वर्षौं लाग्न सक्ने बताएको छ ।
उपराष्ट्रपति ह्यारिस छिमेकी राज्य जर्जियामा पुग्नु भएको छ । उत्तर क्यारोलिना र जर्जिया नोभेम्बरको राष्ट्रपतीय चुनावका लागि प्रमुख स्विङ राज्य हुन् ।
रिपब्लिकन राष्ट्रपतिको उम्मेदवार डोनाल्ड ट्रम्पले पनि हप्ताको सुरुमा आँधीबाट भएको क्षतिको अवलोकन गर्न जर्जिया भ्रमण गर्नुभएको थियो ।
राष्ट्रपति बाइडेन बिहीबार फ्लोरिडा र जर्जियाका प्रभावित समुदायहरूमा जाने कार्यक्रम रहेको छ ।
हेलिन आँधी गएको बिहीबार क्याटेगोरी ४ को आँधीका रूपमा अमेरिकामा प्रवेश गरेको थियो । हेलिनका कारण भएका आधाजसो मृत्यु केवल उत्तर क्यारोलिनामै भएका छन् ।
अन्य पाँच राज्यहरू दक्षिण क्यारोलिना, जर्जिया, फ्लोरिडा, टेनेसी र भर्जिनियामा पनि आँधीका कारण मृत्यु हुनेको संख्या रहेको छ ।
हेलिन पछिल्ला वर्षहरूमा अमेरिकामा आएको सबैभन्दा घातक आँधीमध्ये एक भएको छ । यसले २०२२ मा १५६ जनाको ज्यान लिने हरिकेन इयानको भन्दा बढी जनधनको क्षति पुर्याएको छ ।