रुसी क्षेत्रमा प्रवेश गर्ने युक्रेनी सेनालाई हटाउन पुटिनको आदेश
प्रकाशित मिति : श्रावण २८, २०८१ सोमबार
Russian President Vladimir Putin meets with the head of Federal Financial Monitoring Service at the Kremlin in Moscow on March 9, 2023. (Photo by Mikhail KLIMENTYEV / SPUTNIK / AFP)
राष्ट्रपति भ्लादिमिर पुटिनले सोमबार रुसी क्षेत्रमा प्रवेश गर्ने युक्रेनी सेनालाई ‘हटाउन’ आफ्नो सेनालाई आदेश दिनुभएको छ ।
अधिकारीहरूले युद्धबाट १ लाख २० हजारभन्दा बढी मानिसलाई टाढा सारिएको बताएपछि पुटिनले उक्त आदेश दिनुभएको हो ।
किएभले गत मङ्गलबार रुसको पश्चिमी कुर्स्क क्षेत्रमा आश्चर्यजनक आक्रमण सुरु गर्दै दोस्रो विश्वयुद्धपछि रुसी भूमिमा सबैभन्दा महत्त्वपूर्ण सीमापार आक्रमणमा दुई दर्जनभन्दा बढी बस्ती कब्जा गरेको थियो ।
क्षेत्रीय गभर्नर एलेक्सी स्मिरनोभले पुटिनसँगको बैठकमा लडाइँ सुरु भएपछि करिब १ लाख २१ हजार मानिस कुर्स्क क्षेत्रबाट भागेको, कम्तीमा १२ जना मारिएको र १ सय २१ भन्दा बढी घाइते भएको जानकारी दिनुभयो ।
कुर्स्कका अधिकारीहरूले १४ हजार बासिन्दा भएको बेलोभ्स्की जिल्लालाई समावेश गर्न आफ्नो निकासी क्षेत्र फराकिलो बनाउँदै गरेको घोषणा गरेका छन् ।
छिमेककी बेल्गोरोड क्षेत्रले पनि आफ्नो सीमावर्ती जिल्ला क्रास्नोयारुज्स्कीलाई खाली गरिरहेको बताएको छ ।
युक्रेनले यस क्षेत्रमा कम्तीमा १२ किलोमिटरभित्र पसेर ४० किलोमिटर लामो नयाँ मोर्चाका साथ २८ वटा सहर र गाउँ कब्जा गरेको स्मिरनोभले बताउनुभयो ।