छरिएर रहेका कानुनहरु एकत्रित , गृह मन्त्रालयले तयार गरेको दिग्दर्शन कतिको उपयोगी होला ?
प्रकाशित मिति : जेष्ठ २६, २०८१ शनिबार
गृह मन्त्रालयसँग सम्बन्धित कानुन र कागजातहरु अब एकै स्थानमा उपलब्ध हुने भएका छन् । मन्त्रालयसँग सम्बन्धित कानुन, निर्देशिका, परिपत्रलगायत सामग्रीहरु एकै स्थानमा उपलब्ध गराउन पुस्तक नै तयार गरिएको हो ।
गृह मन्त्रालयसँग सम्बन्धित कानुन, निर्देशिका तथा परिपत्रहरुको दिग्दर्शन, २०८१ मा यी सामग्रीहरु उपलब्ध हुने भएका हुन् । दिग्दर्शनमा आर्थिक वर्ष २०८०/८१ सम्मका दस्तावेज समावेश गरिएको मन्त्रालयका प्रवक्ता एवं सहसचिव नारायणप्रसाद भट्टराईले जानकारी दिनुभयो ।
प्रत्येक जिल्ला प्रशासन कार्यालयमा समेत पठाउने गरी तयार गरिएको उक्त दिग्दर्शन छिट्टै प्रकाशन गर्ने तयारी रहेको छ ।
मन्त्रालयले तयार गरेको उक्त दिग्दर्शनले दैनिक कार्य सञ्चालनका लागि आवश्यक कानुन तथा नीति, नियमहरु एकै ठाउँमा उपलब्ध हुनेछ भने कागजातहरुको दस्तावेजीकरण पनि भएको छ ।
मन्त्रालयका सहसचिव भरतमणि रिजालको संयोजकत्वमा रहेको कानुन निर्देशिका दिग्दर्शन सङ्कलन तथा प्रकाशन समितिले तयार पारेको दिग्दर्शन गृहसचिव एकनारायण अर्याललाई बुझाएको छ ।
नीति तथा कार्यक्रममा ‘माइल स्टोन’का रुपमा समावेश भएको कार्यक्रमअनुसार मन्त्रालयको कानुन फैसला तथा कार्यान्वयन शाखाले मन्त्रालयसँग सम्बन्धित कानुन तथा कागजातहरुको सँगालो तयार पारिएको मन्त्रालयले जनाएको छ ।
मन्त्रालयसँग सम्बन्धित ऐन, नियम, निर्देशिका, कार्यविधि, परिपत्रलगायत दस्तावेज एकै ठाउँमा उपलब्ध होस् भन्ने उद्देश्यले उक्त दिग्दर्शन तयार पारिएको समितिका सदस्य सचिव शाखा अधिकृत सुनिता थापाले जानकारी दिनुभयो ।
मन्त्रालयले बनाएको दिग्दर्शनलाई चार भागमा विभाजन गरिएको छ । पहिलो भागमा ऐनहरु समावेश गरिएको प्रवक्ता भट्टराईले बताउनुभयो ।
उहाँका अनुसार यसैगरी दोस्रो भागमा नियमहरु, तेस्रो भागमा कार्यविधि तथा परिपत्रहरु र चौथो भागमा नीतिहरु, निर्देशिका, मापदण्डका साथै मन्त्रालयसँग सम्बन्धित विविध दस्तावेज समावेश गरिएको छ ।
जसले छरिएर रहेका कानुनहरु एकत्रित मात्रै भएनन्, सङ्ग्रहितसमेत हुँदा खोजेको समयमा सहजै हेर्न सहज भएको बताइएको छ ।