इजरायल–लेबनान सीमामा उच्च जोखिम रहेको राष्ट्रसङ्घ महासचिबको भनाइ
प्रकाशित मिति : जेष्ठ २५, २०८१ शुक्रबार
संयुक्त राष्ट्रसङ्घका महासचिव एन्टोनियो गुटेर्रेसले लेबनान र इजरायलबीचको सीमा रेखामा व्यापक द्वन्द्वको जोखिम रहेको बताउनुभएको छ ।
गाजा ध्वस्त पार्ने हमाससँगको आठ महिना लामो युद्धपछि उत्तरी सीमा क्षेत्रको भ्रमण गर्दै इजरायली प्रधानमन्त्री बेन्जामिन नेतान्याहूले बुधबार इजरायली सीमामा ‘धेरै तीव्र कारबाहीका लागि तयारी भइरहेको बताउनुभएपछि राष्ट्रसङ्घका प्रमुखको यो धारणा आएको हो ।
इजरायलले गाजा पट्टीमा हमासविरुद्ध युद्ध गरिरहेको बेला हालैका दिनहरूमा हेजबुल्लाह र इजरायलबीच दिनहँ जसो आक्रमण बढेको छ । दुवै समूहलाई इरानलगायत अन्य सहयोगीहरूले समर्थन गरेका छन् ।
“‘ब्लू लाइन’ पार गरेर गोलीबारी जारी राखेकाहरूलाई महासचिवले तत्काल गोलीबारी बन्द गर्न आह्वान गर्नु भएको छ ।
संयुक्त राष्ट्रसङ्घका प्रवक्ता स्टेफन डुजारिकले इजरायल र लेबनानबीचको सीमा रेखालाई उल्लेख गर्दै एक विज्ञप्तिमा यस्तो बताउनु भएको छ ।
निरन्तरको गोलीबारीले यस क्षेत्रका लागि विनाशकारी परिणामसहित व्यापक द्वन्द्व निम्त्याउन सक्ने उहाँले बताउनुभएको छ ।