नेपाल डे परेड: मे १९ आइतबार न्युयोर्कमा नेपाल झल्काउने तयारी
प्रकाशित मिति : बैशाख ३०, २०८१ आईतबार
न्युयोर्कको म्यानहाटनमा मे १९ आईतबार नेपाल डे परेडका लागि तयारी तीब्र पारिएको आयोजकले बताएका छन् । सन् २०१६ देखि न्युयोर्कको म्यानहटनमा नेपाल डे परेड हुँदै आएको छ । यसपटकको नेपाल डे परेडका कन्भेनर तेम्बा शेर्पा रहेका छन् ।
परेडमा नेपाली समुदायका विविध कला, सँस्कृति, भेषभुषाको प्रदर्शन गरिने आयोजक एनआरएनए न्युयोर्क च्याप्टरका अध्यक्ष हेमन्त मल्लले जानकारी दिए । यसबर्षपनि परेडमा न्युयोर्क सिटीका मेयर एरिक आडम्स सहभागी हुने अपेक्षा आयोजकले गरेका छन् ।
गतबर्ष परेडमा न्युयोर्क सिटीका मेयर एरिक आडम्ससहित संघीय र राज्य सांसद लगायत अन्य स्थानीय नेताहरुको समेत सहभागिता रहेको थियो ।
म्यानहटनको ३८ स्ट्रीट र म्याडिसन एभिन्युबाट सुरु हुने परेड म्याडिसन एभिन्युको २४ स्ट्रीटमा पुगेर कार्यक्रममा परिणत हुनेछ । परेडमा सहभागी हुनका लागि आफू उत्साहित रहेको नेपाल डे परेडका पूर्व संयोजक निमा शेर्पाले बताए ।
परेडका लागि न्युयोर्कमा रहेको नेपाली महावाणिज्यदूतावास र एनआरएनए अमेरिकाको विशेष सहयोग रहेको छ भने न्युयोर्कमा रहेका अन्य नेपाली संघ संस्थाहरुसँग पनि समन्वय गरिएको छ । नेपाल र नेपालीको पहिचान झल्कने यस कार्यक्रममा न्युयोर्क र आसपासका क्षेत्रमा बस्ने नेपालीहरुलाई सहभागी हुन प्रचार प्रसार संयोजक चमेली परियारले अनुरोध गरेकी छिन् ।
कभर तस्वीर: गतबर्षको नेपाड डे परेड । (बेनी पोलाटसेक / मेयरल फोटोग्राफी कार्यालय)