न्युयोर्कको क्वीन्समा अर्को अवैध बन्दुकको भण्डार फेला
प्रकाशित मिति : माघ १८, २०८० बिहीबार
एकै सातामा दोस्रो पटक न्युयोर्कको क्वीन्स अधिकारीहरूले अवैध बन्दुक भण्डार कब्जा गरेको बताएका छन् । ४३ वर्षीय लेनोल्ड सिजरलाई क्याम्ब्रिया हाइट्सको घरमा अवैध हतियार राखेको आरोपमा पक्राउ गरेर बुधबार अदालतमा उपस्थीत गराइएको हो । उनीविरुद्ध ३३ वटा अभियोग लगाइएको अभियोजकहरूले बताएका छन् ।
लामो समयको अनुसन्धानपछि सिजरले पोलिमरमा आधारित अनसिरियलाइज्ड बन्दुकका पार्ट्सहरू खरिद गरेको पत्ता लागेको र ती पार्ट्सहरु जोडेर अवैध बन्दुकहरू बनाउन प्रयोग गरिएको अधिकारीहरूले बताएका छन् । सीजरको २३५ औं स्ट्रीटमा रहेको घरमा मंगलबार गरिएको खान तलासीमा त्यस्ता अवैध हतियारहरु भेटिएका हुन् ।
भेटिएका सामाग्रीहरुमा पाँचवटा पार्टर्पुजा जोडेर बनाइएका अवैध पिस्तोल थिए, जसमध्ये तीनवटा छुट्याउन सकिने म्यागजिनहरू र थ्रेडेड ब्यारेलहरू सहित आक्रमणका लागि प्रयोग गरिने हतियारका विशेषतासहित थिए । चार साइलेन्सर, एउटा छोटो ब्यारेल राइफल रूपान्तरण किट, अर्ध स्वचालित पिस्तोललाई पूर्ण स्वचालित मेसिन गनमा रूपान्तरण गर्न सक्ने तीन उपकरण, ६ वटा लोअर रिसीभर ग्रिप मोड्युलहरू, दुई स्लाइडहरू, एक रिसीभर, तीन ब्यारेल, दुईवटा अवैध बन्दुक बनाउन प्रयोग हुने ड्रिल र उपकरण तथा १२ गोला बारुद भर्ने यन्त्रहरू थिए । सिजरले हतियारको आरोपमा दोषी ठहरिएमा १५ वर्षसम्मको जेल सजाय भोग्नुपर्नेछ ।
आफूले सडकबाट बन्दुक हटाउन प्राथमिकता दिएको र अवैध बन्दुकको तस्करीमा भएको बृद्धिको बिरूद्ध लड्न जारी राख्ने क्वीन्सकी डिस्ट्रिक्ट एटार्नी मेलिन्डा काट्जले एक विज्ञप्तिमा बताएकी छिन् । हतियारको समस्याग्रस्त प्रवृत्तिले पहिले नै व्यापक रुपमा रहेको बन्दुक हिंसाको समस्यालाई अझ नराम्रो बनाउने जोखिम रहेको उनको भनाई छ ।
यसरी भेटिएका बन्दुकहरु प्रायः अवैध घरेलु बन्दुकहरू हुन् जसमा क्रम संख्याहरू हुँदैनन्, तिनीहरूलाई पत्ता लगाउन नसकिने बनाउँछ। क्वीन्सले २०२१ पछि न्युयोर्क सिटीका कुनै पनि बरोमा भन्दा बढी अवैध बन्दुक बरामद गरेको देखेको छ । अहिलेसम्म बरामद त्यस्ता अवैध बन्दुकको संख्या ३५१ रहेको अभियोजकहरूले बताएका छन् ।
क्वीन्सका अभियोजकहरूले दाजुभाइ एन्ड्र्यू र एन्जेलोस ह्याजियागलिसलाई उनीहरूको घरमा हस्तलिखित हिट लिस्ट सहित घरेलु बम र अवैध बन्दुकहरू भण्डार गरेको अभियोग लगाएको केही दिन पछि यो मुद्दा आएको हो । क्वीन्सको अष्टोरिया निवासी ती दुई दाजुभाईसँग प्रहरी अधिकारी, न्यायाधीश, राजनीतिज्ञ, सेलिब्रेटी, बैंकर र अन्यलाई आक्रमणको हिट लिस्ट भएको कागजात र नोटबुक पनि भेटिएको थियो । ३९ वर्षीय एन्ड्रयु ह्यात्जियागेलिस र ५१ वर्षीय एन्जेलो ह्याजियागेलिसलाई १३० वटा हतियारसम्बन्धि र अन्य आरोपमा आपराधिक रूपमा अभियोग लगाइएको छ ।