अमेरिकामा झण्डै १६ लाख एसाइलम आवेदन पेन्डिङ, नेपाली ३६४५ , मेक्सिकोबाट आएका नेपाली २२३६
प्रकाशित मिति : पुस १२, २०७९ मंगलबार
अमेरिकामा लगभग १६ लाख एसाइलम आवेदनहरु अध्यागमन अदालतहरू र युएससीआईएसमा विचाराधीन रहेका छन् । जुन अहिलेसम्म पेन्डिङ एसाइलमका मुद्दाहरूको सबैभन्दा ठूलो संख्या हो ।
अमेरिकी अध्यागमन अदालतहरूमा आर्थिक वर्ष २०१२ बाट एसाइलमका मुद्दाहरूमा सात गुणा बढी वृद्धि भएको देखिएको छ । सन् २०१२ मा अध्यागमन अदालतमा १ लाख मुद्दाहरू विचाराधीन थिए भने आर्थिक वर्ष २०२२ को अन्त्यमा साढे ७ लाख मुद्दाहरु विचाराधीन रहेका छन् ।
आर्थिक बर्ष २०२३ को २ महिना अर्थात् अक्टोबर र नोभेम्बरमा मात्र एसाइलमको ब्याकलग ३० हजारभन्दा भन्दा बढी नयाँ केसहरूले बढेको छ । अहिले कुल ७ लाख ८७ हजारभन्दा धेरै मुद्दाहरु अध्यागमन अदालतमा विचाराधिन रहेका छन् ।
२१९ विभिन्न देश र भूभागका एसाइलम आवेदकहरु विभिन्न ४१८ वटा भाषाहरू बोल्छन् । हरेक १० जना मध्ये ३ जना १८ वर्ष मुनिका बालबालिका छन् । एसाइलम आवेदकहरु अधिकांश ग्वाटेमाला, भेनेजुएला, क्युबा र ब्राजिलका छन् । फ्लोरिडा र म्यासाचुसेट्स सबैभन्दा ठूलो एसाइलमन आवेदन वृद्धि भएका राज्यहरू हुन्।
एसाइलमका मुधाको सुनुवाइको औसत पर्खाइ समय लगभग ४ वर्ष ४ महिना रहेको छ । तर ओमाहा, नेब्रास्कामा सबैभन्दा धेरै प्रतिक्षा समय औसत झण्डै ६ बर्ष रहेको छ ।
एसाइलम खोज्नेहरुको बढ्दो संख्यालाई डिपार्टमेन्ट अफ होमल्याण्ड सेक्युरिटीको अल्टरनेटिभ टु डिटेन्सन प्रोग्राम मार्फत इलेक्ट्रोनिक रूपमा निगरानी गरिरहेको छ । जसमध्ये करिब २ हजार आइसको हिराशतमा रहेका छन् ।
अध्यागमन अदालतमा विचाराधिन रहेका एसाइलमका मुद्दाहरुमध्ये ३६४५ नेपालीहरुका मुद्दाहरु हुन् । उनीहरुका सबैभन्दा धेरै १८७० मुद्दा न्युयोर्कमा विचाराधिन रहेका छन् भने सान फ्रान्सिस्कोमा ९२६ मुद्दाहरु विचाराधिन छन् । सान एन्टोनियोमा २७६, बोष्टनमा ७६, बाल्टिमोरमा ७५ नेपालीका एसाइलम मुद्दाहरु विचाराधिन रहेका छन् ।
एसाइलमका मुद्दा विचाराधिन रहेका नेपालीहरुमा ६३८ जना २५ देखि ३४ बर्षसम्मका रहेका छन् भने ३८७ जना १८ देखि २४ बर्षसम्मका छन् । त्यस्तै ३५ देखि ४४ बर्षसम्मका ३२६ जना र ४५ देखि ५९ बर्षसम्मका ८६ जना रहेका छन् । १७ बर्षभन्दा कम उमेरका ७२ जना छन् भने ६० काटेकाहरु १३ जना रहेका छन् ।
अदालतमा एसाइलम मुद्दा विचाराधिन हुने कुल नेपालीमध्ये पहिलो युएससीआईएसमा आवेदन दिएर अदालतमा रिफर गरिएकारुहरु १४०९ जना रहेका छन् । सिधै अध्यागमन अदालतमा पठाइएकाहरु २२३६ जना रहेका छन् । सिधै अध्यागमन अदालतमा पठाइएकाहरु मेक्सिकोको सिमाक्षेत्रबा विनाभिसा अमेरिका प्रवेश गर्नेहरु हुन् ।