अमेरिकाले दियो महामारी अगाडिको भन्दा पनि धेरैलाई ग्रिनकार्ड पाउनेगरी आप्रवासी भिसा
प्रकाशित मिति : मंसिर २९, २०७९ बिहीबार
अमेरिकाले आर्थिक वर्ष २०२२ मा विदेशमा रहेका आप्रवासीहरूलाई करिब ५ लाख आप्रवासी भिसा जारी गरेको छ । कोभिड १९ महामारीको सुरुमा भिसा स्वीकृतिमा तीव्र गिरावट आएको आर्थिक बर्ष २०२२ मा अध्यागगनले गति लिएको छ । यो संख्या कोरोना महामारी अगाडि आर्थिक बर्ष २०१९ को भन्दा पनि धेरै हो ।
सेप्टेम्बर ३० मा समाप्त भएको १२ महिनाको अवधिमा अमेरिकी विदेश मन्त्रालयले ग्रिनकार्ड पाउनेगरी अमेरिका आउनका लागि ४ लाख ९३ हजारलाई आप्रवासी भिसा जारी गरेको छ । यो आर्थिक वर्ष २०२१ को तुलनमा ७३ प्रतिशत र २०१९ को तुलनामा ७ प्रतिशत बृद्धि हो ।
अमेरिकामा आप्रवासी भिसामा आउने धेरै कानुनी च्यानलहरू छन्ज, जसमध्ये परिवारमा आधारित, डिभी लोटरी र रोजगारमा आधारित आप्रवासी भिसा मुख्य हुन् । त्यो बाहेक अमेरिकी शरणार्थी कार्यक्रम पनि रहेको छ । पर्यटकहरू, अल्पकालीन कामदारहरू र अन्य अस्थायी भिसा वाहकहरु गैर आप्रवासी भिसामा अमेरिका आउँछन् भने आप्रवासी भिसामा अमेरिका आउनेहरुले अमेरिकामा बस्न र काम गर्न पाउने गरी ग्रिनकार्ड पाउँछन् । र अमेरिकामा निश्चित बर्ष बसेपछि नागरिकता समेत पाउँछन् ।
आर्थिक बर्ष २०२१ मा २ लाख ८५ हजारले र आर्थिक बर्ष २०२० मा २ लाख ४१ हजारले आप्रवासी भिसा पाएका थिए । अहिलेसम्मको इतिहासमा आर्थिक बर्ष सन् २०१६ मा सबैभन्दा धेरै ६ लाख १८ हजारले अमेरिकाको आप्रवासी भिसा पाएका छन् ।