अमेरिकी नागरिकता हुनेसँग विवाह गर्न मंगेतर भिसामा अमेरिका आए एकबर्षमा ६७ नेपाली
प्रकाशित मिति : कार्तिक ११, २०७९ शुक्रबार
अमेरिकी नागरिकता हुनेसँग विवाह गर्न एकबर्षमा ६७ जना नेपालीहरु अमेरिका आएका छन् । अमेरिकी विदेश मन्त्रालय ब्यूरो अफ कन्सुलर अफेयर्सका अनुशार आर्थिक बर्ष २०२२ मा यी नेपालीहरु मंगेतर भिसामा अमेरिका आएका हुन् ।
आर्थिक बर्ष २०२२ को पहिलो महिना २०२१ को अक्टोबरमा १० जना, नोभेम्बरमा ७ जना र डिसेम्बरमा १२ जना मंगेतर भिसा के मा अमेरिका आएका थिए । अमेरिकामा आर्थिक बर्ष अक्टोबर १ बाट सुरु हुन्छ ।
२०२२ को जनवरीमा ९ जना, फरबरीमा ५ जना, मार्चमा ३ जना, अप्रिलमा ४ जना, मेमा १ जना, जुनमा २ जना, जुलाईमा २ जना, अगस्तमा ५ जना र सेप्टेम्बरमा ७ जना नेपालीहरुले मंगेतर भिसा पाएका थिए । यो भिसामा अमेरिका आइसकेपछि ९० दिनभित्र अमेरिकी नागरिकसँग विवाह गर्नुपर्ने प्रावधान रहेको छ ।
अमेरिकी नागरिकले विदेशमा रहेका आफ्ना मंगेतरलाई के वान भिसामा अमेरिका झिकाएर विवाह गर्न सक्छन् । त्यसका लागि अमेरिकी नागरिकले सुरुमा युएससीआईएसमा आई १२९ एफ फर्म भरेर आवेदन दिनुपर्छ ।
सुरुमा आई १२९ फर्म भरेर युएसपीएस वा अन्य कुरियरमार्फत युएससीआईएसको ठेगानामा पठाउनुपर्छ । यसरी पठाउँदा युएसपीएसबाट पठाउने ठेगाना र अन्य कुरियरबाट पठाउने ठेगाना फरक फरक रहेको छ । फर्ममा हस्ताक्षर गरेर पठाउनुपर्ने र हस्ताक्षर नगरिएको फर्म अस्वीकार गरिने युएससीआईएसले जनाएको छ ।
यो आवेदन दिंदा युएससीआईएमा ५३५ डलर शुल्क तिर्नुपर्छ । यदि मंगेतरका २१ बर्ष नपुगेका छोराछोरी भएमा उनीहरुका लागि के ३ भिसा प्राप्त गर्न युएससीआईएसमा शुल्क तिर्नु पर्दैन । युएससीआईएसमा मनी अर्डर, व्यक्तिगत चेक वा क्यासियर चेकमार्फत रकम भुक्तानी गर्न सकिन्छ ।
युएससीआईसमा कसरी फाइल गर्ने थप जानकारीका लागि यहाँ क्लीक गर्नुहोला ।
लकबक्समा फाइल गरिएका आवेदको शुल्क क्रेडिट कार्डमार्फत पनि तिर्न सकिन्छ । चेकमार्फत तिर्नेले युएस डिपार्टमेन्ट अफ होमल्याण्ड सेक्युरिटीका नाममा चेक पठाउनुपर्छ । आवेदन पठाउँदा अमेरिकी नागरिक भएको प्रमाण, विगतमा कुनै विवाह गरेको भए आफू र मंगेतर दुबैले पहिलेको विवाह खारेज गरेको प्रमाण, ३० दिनभित्र लिइएको आफ्नो र मंगेतरको पासपोर्ट साइजको एकएक फोटो लगायतका कागजात पठाउनुपर्छ ।
युएससीआईएसको सर्भिस सेन्टर अनुशार आवेदनबारे निर्णय हुन लाग्ने अवधि फरक फरक हुन्छ । क्यालिफोर्निया सभिस सेन्टरमा १४ महिनासम्म, नेब्रास्का सर्भिस सेन्टरमा ४ महिनासम्म, पोटामिक सर्भिस सेन्टरमा ५ महिनासम्म, टेक्सास सर्भिस सेन्टरमा १४ महिनासम्म, भर्मोन्ट सर्भिस सेन्टरमा २० महिनासम्मको अवधि लाग्छ ।
आवेदन स्वीकृत भएपछि युएससीआईएसले आवेदन नेशनल भिसा सेन्टरमा पठाउँछ । नेशनल भिसा सेन्टरले भिसाको थप प्रकृयाबारे उल्लेख गर्दै पत्र पठाउँछ । नेशनल भिसा सेन्टरले आवेदन दूतावासमा पठाइसकेपछि दूतावासले मंगेतरको अन्तरवार्ता लिन्छ । र भिसा जारी गरिन्छ । हरेक के भिसा आवेदकहरुले फरक फरक भिसा आवेदन शुल्क तिर्नुपर्छ ।
नेशनल भिसा सेन्टरको प्रकृयाबारे थप जानकारीका लागि यहाँ क्लीक गर्नुहोला ।
भिसा अन्तरवार्तामा आउँदा भरेको डीएस १६० फर्म भरेको कन्फर्मेशन नम्बर, पासपोर्ट, जन्मदर्ता प्रमाण, पहिले विवाह गरेको भए डिभोर्सको कागजात, प्रहरी रिपोर्ट, मेडिकल रिपोर्ट, फर्म आई १३४ भरेको स्पोन्सर, २ वटा फोटो, विवाह गर्ने अमेरिकी नागरिकसँगको सम्बन्धको प्रमाण लगायतका कागजातहरु साथमा लैजानुपर्छ ।
कतिपय आवेदनमा आवेदकले छिटो कागजात नबुझाउने, थप सुचनाहरु बुझाउनका लागि दिइएको निर्देशन समयमा पालना नगर्ने, दूतावासमा थप अनुसन्धान गर्नुपर्ने अवस्था भएमा प्रशासनिक प्रकृयामा जाने लगायतका कारणले लामो समय पनि लाग्नसक्छ ।