गतबर्ष १४३ नेपालीको एसाइलम अमेरिकी अदालतबाट स्वीकृत, १४ बर्षमा सबैभन्दा कम
प्रकाशित मिति : आश्विन ३१, २०७९ सोमबार
अमेरिकामा अदालतबाट एसाइलम स्वीकृत हुनेमा नेपालीहरु टपटेनमा परेका छन् । डिपार्टमेन्ट अफ होमल्याण्ड सेक्युरिटीको तथ्यांक अनुशार गतबर्ष अर्थात् आर्थिक बर्ष २०२१ मा १४३ जना नेपालीहरुको एसाइलम आवेदन अमेरिकाको अध्यागमन अदालतबाट स्वीकृत गरिएको छ ।
कोरोनाको महामारीका कारण पनि २०२१ मा अदालतबाट एसाइलम स्वीकृत हुनेहरुको संख्यामा कमी देखिएको छ । यद्यपी २०२० मा अमेरिकी अदालतबाट ३०८ नेपालीहरुको एसाइलम स्वीकृत भएको थियो भने २०१९ मा यो संख्या झण्डै दोब्बर अर्थात् ६०६ रहेको थियो ।
अमेरिकी अदालतमा एसाइलम पाउनेमा सबैभन्दा धेरै एल साल्भाडोर, दोश्रोमा ग्वाटेमाला, तेश्रोमा चीन, चौथोमा इन्डिया, पाँचौंमा होण्डुरस, छैठौंमा भेनेजुएला, सातौंमा मेक्सिको, आठौंमा निकारागुवा, नवौंमा रसिया र दशौंमा नेपाल छन् । २०२१ मा कुल ७ हजार ३ सय ६७ जनाको एसाइलम अदालतबाट स्वीकृत भएको थियो, जसमा नेपालीहरुको १ दशमलव ९ प्रतिशत हो ।
आर्थिक बर्ष २०१८ मा ४७० जना नेपालीहरुले अमेरिकाको अध्यागमन अदालतबाट एसाइलम पाएका थिए । त्यस्तै २०१७ मा यो संख्या २९० रहेको थियो भने २०१६ मा २६० रहेको थियो । २०१५ मा भने २५० नेपालीहरुले अमेरिकाको अध्यागमन अदालतबाट एसाइलम पाए भने आर्थिक बर्ष २०१४ मा २८२ जनाले पाए ।
त्यस्तै २०१३ मा ३८५ र २०१२ मा ३७९ नेपालीहरुले अमेरिकी अध्यागमन अदालतबाट एसाइलम पाएका थिए । सन् २०११ मा ३१० र सन् २०१० मा २१७ जना नेपालीको एसाइलम अदालतबाट स्वीकृत भएको डिपार्टमेन्ट अफ होमल्याण्ड सेक्युरिटीको तथ्यांक रहेको छ ।
सन् २००९ मा १७१, सन् २००८ मा १४८, सन् २००७ मा १३१, सन् २००६ मा १६५, सन् २००५ मा ८५, सन् २००४ मा ९३, सन् २००३ मा ५७, सन् २००२ मा ३७ र सन् २००१ मा ३१ जना नेपालीहरुको एसाइलम अदालतबाट स्वीकृत भएको थियो । यसरी हेर्दा गतबर्ष अमेरिकी अदालतबाट एसाइलम पाउने नेपालीहरुको संख्या १४ बर्षमा नै कम हो ।
अदालतबाट एसाइलम पाउनेहरु मेक्सिको हुँदै अमेरिकी सिमाक्षेत्रबाट गैरकानुनी रुपमा प्रवेश गरेका र विभिन्न भिसामा अमेरिका आएर एसाइलम दावी गर्दा युएससीआईएसबाट एसाइलम स्वीकृत नभई अदालतमा पठाइएकाहरु हुन् ।