एकसाथ आवेदन दिएपनि युएससीआईएसले पहिले वर्क परमिट र पछि एड्भान्स परोलबारे निर्णय गर्ने
प्रकाशित मिति : आश्विन २२, २०७९ शनिबार
ग्रिनकार्ड आवेदन आई ४८५ फाइल गरेर उक्त आवेदन पेन्डिङ अवस्थामा रहेका आवेदकहरुले एड्भान्स परोल र वर्क परमिट आवेदन एकसाथ फाइल गरेको खण्डमा वर्क परमिटको आवेदनबारे पहिले निर्णय गर्ने युएससीआइएसले जनाएको छ ।
यदि वर्क परमिट आवेदन स्वीकृत भएको खण्डमा एड्भान्स परोलबारे कुनै पनि कुरा समावेश नगरी वर्क परमिटको कागजात जारी गर्ने युएससीआईएसले प्रष्ट पारेको छ । त्यसपछि एड्भान्स परोलको आवेदनबारे अलग्गै निर्णय लिइने जनाइएको छ ।
एड्भान्स परोल र वर्क परमिट आवेदन एकसाथ दिएका आवेदकले सुरुमा वर्क परमिटको आवेदनको रिसिप्ट र त्यसको केही समयपछिमात्र एड्भान्स परोल वा ट्राभल डकुमेन्ट आवेदनको रिसिप्ट प्राप्त गर्नसक्ने जनाइएको छ । त्यसैले एकसाथ रिसिप्ट वा निर्णय प्राप्त नगर्दैमा एड्भान्स परोलबारे सोधपुछ गर्न आवश्यक नभएको युएससीआईसले सुचित गरेको छ ।
वर्क परटिको तुलनामा एड्भान्स परोलमा निर्णय गर्न ढिलो हुने भएतापनि आवेदकले युएसीआईएसको सामान्य प्रकृया अवधिभित्र निर्णय प्राप्त गर्न नसकेको खण्डमा भने युएससीआईएसमा सोधपुछ गर्न सक्नेछन् । त्यसका लागि अनलाइनमार्फत युएससीआईएसमा आफ्नो आवेदनबारे सोधपुछ गर्न सकिनेछ ।
एड्भान्स परोल र वर्क परमिट आवेदन फरक फरक तरिकाले प्रकृयामा लैजाँदा वर्क परमिटको निर्णय प्राप्त गर्नमा छिटो हुने युएससीआईएसको भनाई छ ।