२०१५ अगाडि अमेरिका आएका कागजपत्रविहिनले स्वत ग्रिनकार्ड पाउने बिल संसदमा
प्रकाशित मिति : श्रावण ८, २०७९ आईतबार
सन् २०१५ अगाडि अमेरिका आएका कागजपत्रविहिनले ग्रिनकार्ड आवेदन दिनसक्ने बिल संसदमा पेश गरिएको छ । सांसद जो लफग्रेनले तल्लो सदन प्रतिनिधिसभामा एचआर ८४३३ नामको उक्त बिल सार्वजनिक गरेका हुन् ।
संसदबाट पारित भएको खण्डमा यो बिलले अमेरिकामा कम्तीमा ७ बर्ष बसेका कागजपत्रविहिनलाई अमेरिकी सरकारसमक्ष ग्रिनकार्डका दर्ता गराउनका लागि रजिष्टी्रको निर्माण गर्ने छ । संसदले सुरुमा सन् १९२९ मा रजिष्ट्रीको निर्माण गरेको थियो तर सन् १९८६ पछि भने अपडेट गरिएको छैन ।
अहिलेसम्मको नियम अनुशार सन् १९७२ भन्दा अगाडि अमेरिका आएकाहरुलेमात्र रजिष्ट्रीमार्फत ग्रिनकार्ड प्राप्त गर्न सक्छन् । तर अहिले संसदमा सार्वजनिक भएको बिल पारित भएमा १९७२ को कटअफ मिति विस्थापन हुनेछ भने नयाँ मिति कायम हुनेछ ।
बिलमा सन् २०१५ को जनवरी १ लाई नयाँ मिति कायम गर्ने प्रस्ताव गरिएको छ । अर्थात् यो मितिभन्दा अगाडि अमेरिका आएकाहरुले ग्रिनकार्ड प्राप्त गर्न सक्नेछन् । यदि यो पारित भएमा अमेरिकामा साढे ८ मिलियन कागजपत्रविहिनहरुलाई फाइदा हुनेछ, जसमा ७ दशमलव ९ मिलियन कागजपत्रविहिनहरु अमेरिकामा औषत १७ बर्ष बसिसकेका छन् ।
अहिलेको रजिष्ट्री अनुशार ग्रिनकार्ड पाउनका लागि सन् १९७२ को जनवरी १ भन्दा अगाडि अमेरिका आएको, अमेरिका आइसकेपछि लगातार अमेरिकाभित्रै बसोबास गरेको, आवेदन दिने बेलामा अमेरिकामा भौतिक रुपमा रहेको, राम्रो चरित्र भएको, निश्चित प्रकारका अपराधका कारण अमेरिकामा प्रतिबन्ध नलागेको हुनुपर्छ । तर कटअफ मिति निकै पूरानो भएका कारण रजिष्ट्रीमार्फत ग्रिनकार्ड आवेदन दिनेको संख्या निकै कम छ । सन् २०१५ देखि २०१८ भित्र जम्मा ३०५ जनाले आवेदन दिएका थिए ।
संसदमा सार्वजनिक यो बिल प्रतिनिधिसभाबाट पारित भएमा सिनेटबाट पनि पारित हुन आवश्यक छ । त्यसपछि बिल राष्ट्रपति समक्ष पुगेपछि राष्ट्रपतिले हस्ताक्षर गरेपछि कानून बन्छ । तर विगतमा पनि पारित हुन असफल भएको यो बिल यसपटक पनि पचास पचासमा विभाजित सिनेटमा पारित हुनेमा आशंका रहेको छ ।