न्युयोर्क सिटीमा एसाइलम खोज्नेलाई सहयोगका लागि मेयर आडम्सबाट संघीय श्रोत आव्हान
प्रकाशित मिति : श्रावण ३, २०७९ मंगलबार
न्युयोर्क सिटीका मेयर एरिक आडम्सले न्युयोर्क सिटीमा एसाइलम खोज्नेहरूलाई सहयोग गर्न संघीय स्रोतहरूको लागि आह्वान गरेका छन् । पछिल्ला केही हप्ताहरूमा शरण खोज्दै न्युयोर्क सिटीमा आउनेहरुको संख्यामा भएको उल्लेख्य बृद्धिपछि मेयर आडम्सले संघीय सरकारसँग सहयोगको आव्हान गरेका हुन् ।
केहीदिन यतामात्र न्युयोर्क सिटीको आवासीय प्रणालीमा २८ सय जनाभन्दा धेरै एसाइलम खोज्नेहरु प्रवेश गरिसकेका छन् । न्युयोर्क सिटीले एसाइलम खोज्ने व्यक्तिहरूलाई न्युयोर्क सिटीले व्यापक सहयोग र स्रोतहरू उपलब्ध गराउन सक्ने कुरा सुनिश्चित गर्न संघीय सरकारसँग मिलेर काम गरिरहेको छ।
न्युयोर्क सिटी आप्रवासीहरूको सहर रहेको र सधैं रहनेछ बताउँदै मेयर आडम्सले न्युयोर्क सिटीले नयाँ आउनेहरूलाई खुला हातले स्वागत गर्ने बताए । यही मूल्यमान्यताले न्युयोर्क सिटी संसारभरका मानिसहरूका लागि स्वतन्त्रताको ज्योति बनेको तथा आर्थिक र सांस्कृतिक पारवहाउस बनेको उनले बताए ।
यी मानवीय मूल्यहरू घरबारविहीनहरुका लागि पनि लागु हुने मेयर आडम्सले बताए । न्युयोर्क सिटीसँग कुनै पनि कारणले घरबारविहीन भएकालाई घरमा राख्ने नैतिक र कानुनी दायित्व रहेको उल्लेख गर्दै उनले हाल न्युयोर्क सिटीले ल्याटिन अमेरिका र अन्य क्षेत्रहरूबाट आउने शरणार्थीहरूको संख्यामा उल्लेखनीय वृद्धि भएको अनुभव गरिरहेको बताए ।
कतिपय परिवारहरू शरण खोज्दै टेक्सास र एरिजोना सरकारले पठाएका बसहरूमा आइपुगेको उनले बताए । अन्य कतिपयलाई संघीय सरकारले पठाएको उल्लेख गर्दै उनीहरुलाई आश्रयको अधिकार प्रदान गर्ने कानुनी जनादेश पूरा गर्न र न्युयोर्क सिटीको प्रणालीमा प्रवेश गर्नेहरूलाई उच्च गुणस्तरको आश्रय र सेवाहरू प्रदान गर्न तुरुन्तै थप संघीय स्रोतहरू चाहिने मेयर आडम्सले बताए ।
यदि न्युयोर्क सिटीले संघीय सरकारबाट यी अत्यावश्यक स्रोतहरू प्राप्त गर्न नसकेमा शरण खोज्दै न्युयोर्क आउनेहरुलाई योग्य स्तरको सहयोग प्रदान गर्न संघर्ष गनुपर्ने उनले बताए । मेयर आडम्सले संघीय सरकारलाई न्युयोर्क शहरसँग सहकार्य गर्न आह्वान गरेका छन् । जसबाट न्युयोर्क सिटीले शरण खोज्नेहरुलाई सही प्रक्रिया पत्ता लगाउन तथा आर्थिक र प्राविधिक स्रोतहरू उपलब्ध गराउन सक्नेछ ।
कानून अनुसार शरणार्थीहरूले मानवीय सुरक्षा खोज्दा संयुक्त राज्य अमेरिकामा बस्ने अधिकार भएको उल्लेख गर्दै मेयर आडम्सले न्युयोर्क शहर हालै शरण खोज्दै आएकाहरु र हाल बसोबास गरिरहेका जनसंख्याहरूका लागि सेवाहरू र पूर्वाधारहरूको प्रावधानको लागि जिम्मेबार रहेको बताएको छन् । आफूहरु यस विषयमा संघीय साझेदारहरूसँग छलफलमा रहेको र शीघ्र समाधानको लागि तत्पर रहेको उनले बताए ।