एसाइलम आवेदकलाई एसाइलम आवेदन फर्म आई ५८९ अपडेट गर्न सुझाव
प्रकाशित मिति : असार २६, २०७९ आईतबार
अमेरिकामा युएससीआईएसमा एसाइलम आवेदन दिएकाहरुले एसाइलम र देशनिकाला हुनबाट रोक्ने आवेदन आवेदन फर्म आई ५८९ भरेको पाँचबर्ष वा त्योभन्दा पनि लामो समय पेन्डिङ हुने सामान्य भएको छ । ५ बर्ष वा त्योभन्दा पनि अगाडि भरिएको फर्म आई ५८९ मा उल्लेख भएका कैयन विवरणहरु अन्तरवार्ताका बेलामा आउटडेटेड हुनु पनि स्वभाविक नै हो ।
आवेदन दिएपछिका बर्षहरुमा आवेदकका कैयन विवरणहरु परिवर्तन भएका हुनसक्छन्, जुन आई ५८९ फर्ममा अपडेट गर्न आवश्यक हुन्छ । यस्तो अपडेट एसाइलम अन्तरवार्ताको बेलामा गर्न सकिने कानून व्यवसायीहरुको सुझाव रहेको छ ।
एसाइलम अफिसमा अन्तरवार्ताको मिति आइसकेपछि अन्तरवार्ताका क्रममा एसाइलम अधिकृतले मौखिक रुपमा आवेदकसँग आई ५८९ फर्मको पुनरावलोकन गर्छन् । सामान्यतया एसाइलम अधिकृतले सुरुका ४ पेजमा बढी ध्यान केन्द्रीत गर्छन्, जसमा आवेदकको नाम, ठेगाना, दम्पत्ति वा छोराछोरीको विवरण, शिक्षा र जागिरको विवरण, परिवारका अन्य सदस्यहरुको स्थान र विवरण उल्लेख भएको हुन्छ ।
यसबारे एसाइलम अधिकृतले आवेदकलाई प्रश्नहरु सोधेर कुनै नयाँ अपडेट भएको खण्डमा रातो रंग मसी भएको कलमले फर्ममा अपडेट गर्छन् । उनीहरुले हरेक परिवर्तनलाई गणना गरेर कतिवटा परिवर्तन भए भन्नेबारे संख्यामा समेत उल्लेख गर्छन् । र अन्तरवार्ताको अन्त्यमा ती परिवर्तनहरु सुनिश्चित गर्न आवेदकले हस्ताक्षर गर्नुपर्ने हुनसक्छ ।
धेरै बर्षपहिले एसाइलम आवेदन दिएकाहरुको पारिवारिक स्थीति लगायतका कैयन विवरणहरु परिवर्तन भएका हुनसक्छन् । अविवाहितले विवाह गरेका हुनसक्छन् भने बच्चाबच्ची पनि भएका हुनसक्छन् । जागिर लगायतका विवरणहरुपनि परिवर्तन भएका हुनसक्छन् । यी विवरणहरु फर्ममा उल्लेख गर्नुपर्छ । अन्तरवार्ताको बेलामा यी सबै विवरण अपडेट गराउन लामो समय लाग्नेमात्र होइन, स्थान परिवर्तन, नयाँ जागिर लगायतका मितिहरु सम्झन पनि कठिन हुनसक्छ ।
यस्तो अवस्थामा अन्तरवार्ताको सुरुमा नै आवेदकले परिवर्तन भएका विवरणहरु एसाइलम अधिकृतलाई लिखित रुपमा दिन कानून व्यवसायीहरुले सुझाव दिएका छन् । अन्तरवार्ताको सुचना आइसकेपछि फर्म आई ५८९ का सुरुका ४ पेजका विवरणहरु परिवर्तन भए नभएको यकिन गर्न सुझाव दिइएको छ । कुनै विवरणहरु परिवर्तन भएको भएमा त्यसलाई कागजमा लेख्न र एसाइलम अन्तरवार्ताका बेलामा एसाइलम अधिकृतलाई दिन उपयुक्त हुने कानून व्यवसायी ज्यासन जुबोको भनाई छ । यसो गर्दा लामो समय नलाग्ने र प्रकृया सहज हुने उनको अनुभव छ ।
विगतमा बुझाएको फर्म आई ५८९ मा कुनै गल्ती भएको भएमा पनि अन्तरवार्ता अगाडि सच्याउनु उपयुक्त हुन्छ । त्यसका लागि लिखित अपडेट सिटको पनि प्रयोग गर्न सकिन्छ । यसरी लिखित रुपमा अपडेटहरु बुझाउँदा एसाइलम अधिकृतहरुले सहज अनुभव गर्ने गरेको कानून व्यवसायी जुबोको सुझाव छ ।
अध्यागमन अदालतका सन्दर्भमा भने न्यायाधिसहरुले फर्म आई ५८९ बारे खासै प्रश्न नगर्ने र कसैकसैले फर्म आई ५८९ मा भरिएको विवरण सही भए नभएको प्रश्न गर्ने जनाइएको छ । मौखिक रुपमा नै सुनुवाईको सुरुमा फर्म अपडेट गर्न सम्भव त हुन्छ, तर प्राय न्यायाधिसले त्यसलाई झिंझोलाग्ने र समयको बर्बादीका रुपमा मात्र लिन्छन् । यो अवस्थामा नयाँ फर्म आई ५८९ भरेर अन्य प्रमाणका साथमा बुझाउन सकिन्छ भने पूरानै फर्मका साथमा छुट्टै अपडेट सिट तयार पारेर पनि बुझाउन सकिन्छ । ठूला परिवर्तनहरु नभएको खण्डमा पूरानै फर्मका साथमा अपडेट सिट बुझाउन कानून व्यवसायीको सुझाव छ । किनभने कतिपय न्यायाधिसले सुरुमा बुझाएको ओरिजिनल फर्म समेत माग्नसक्छन् ।