म्याद सकिएका पासपोर्टमा अमेरिकनहरु अब अमेरिका फर्कन नपाउने, दूतावासमा सम्पर्क गर्न सुझाव


प्रकाशित मिति : असार १७, २०७९ शुक्रबार

म्याद सकिएका पासपोर्टमा अमेरिकनहरु अब अमेरिका फर्कन नपाउने भएका छन् । कोरोना महामारीका कारण अमेरिकी सरकारले अमेरिकनहरुलाई म्याद सकिएका पासपोर्टमा समेत स्वदेश फर्कन पाउने व्यवस्था गरेको थियो ।

सन् २०२१ को मे २८ अमेरिकाको कस्टम एण्ड बोर्डर प्रोटेक्सन सीबीपीले विदेशमा रहेका अमेरिकनहरु म्याद सकिएको पासपोर्टमा समेत अमेरिका आउनसक्ने व्यवस्था गरेको थियो । सुरुमा उक्त म्याद डिसेम्बर ३१ सम्ममात्र रहेकोमा डिसेम्बर २१ मा तीनमहिना थपेर सन् २०२२ को मार्च ३१ सम्म बनाइएको थियो ।

त्यस्तै मार्च २३ मा जुन ३० सम्मका लागि म्याद थप गरिएकोमा अब भने म्याद नथपिएको सीबीपीले स्पष्ट पारेको छ । अमेरिकी सरकारले विदेशमा रहेका अमेरिकनहरु सन् २०२० को जनवरी १ पछि एक्सपायर भएको पासपोर्टमा अमेरिका आउनसक्ने व्यवस्था गरेको थियो । कोरोना महामारीका कारण विदेशमा नै अड्कीएका अमेरिकनहरुलाई पासपोर्ट नविकरणमा समय लाग्नसक्ने र स्वदेश फर्कन समस्या नहोस् भनेर उनीहरुलाई अमेरिका आउन अनुमति दिइएको थियो ।

अमेरिकाबाट बाहिर जाँदा भने म्यादसकिएका पासपोर्टमा यात्रा गर्न नसकिने प्रावधान थियो । त्यस्तै म्याद सकिएका पासपोर्ट अमेरिका आउने क्रममा विदेशी मुलुकका एयरपोर्टमा ट्रान्जिटको अवस्थामा बाहेक एक मुलुकबाट अर्को मुलुकमा जानसमेत प्रयोग गर्न नसकिने अवस्था थियो ।

म्याद सकिएका पासपोर्टमा अमेरिका फर्कन उक्त पासपोर्ट बयस्कका सन्दर्भमा १० बर्षको म्याद सहित जारी गरिएको हुनुपर्ने र पासपोर्ट जारी हुँदा १५ बर्ष वा त्यो भन्दा कम उमेरका रहेकाका सन्दर्भमा ५ बर्षको म्यादसहित जारी गरिएको हुनुपर्ने प्रावधान रहेको थियो ।

अब भने म्याद सकिएको पासपोर्टमा अमेरिका आउन नदिइने भएकाले नविकरणका लागि आवेदन दिन नजिकको अमेरिकी दूतावास वा कन्सुलेटमा सम्पर्क गर्न सुझाव दिइएको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com