Follow @khasokhasmag

अमेरिकामा शरण खोज्नेलाई मेक्सिको फिर्ता गर्नेे नीति बाइडेन प्रशासनले अन्त्य गर्नसक्ने सर्वोच्चको फैसला


प्रकाशित मिति : असार १६, २०७९ बिहीबार

अमेरिकाको सर्वोच्च अदालतले अमेरिकामा शरण खोज्नेलाई अदालती सुनुवाईसम्मका लागि मेक्सिको फिर्ता पठाउने नीति बाइडेन प्रशासनले अन्त्य गर्नसक्ने फैसला गरेको छ । सुरुदेखि नै बाइडेन प्रशासनले ट्रम्पकालिन उक्त नीतिको अन्त्य गर्न चाहेपनि तल्ला अदालतहरुले लगाएको रोकका कारण अन्त्य गर्न सकेको थिएन ।

आज सर्वोच्चका ९ मध्ये ५ जना न्यायाधिसहरु ट्रम्पकालिन उक्त नीति बाइडेन प्रशासनले अन्त्य गर्नसक्ने पक्षमा उभिएका थिए । अध्यागमन कानूनले संघीय सरकारलाइै ट्रम्पकालिन उक्त नीति अन्त्य गर्नसक्ने अधिकार प्रदान गर्ने सर्वोच्च अदालतको ठहर छ ।

आजको सर्वोच्चको फैसला ट्रम्पकालिन कडा अध्यागमन नीतिहरु उल्टाउन गरेका प्रयासहरुमा तल्ला अदालतहरुमा कैयन पराजय भोग्दै आएको बाइडेन प्रशासनको मुख्य जीतका रुपमा हेरिएको छ । बाइडेन प्रशासनले यो नीति अन्त्य गर्दा कैयन रिपब्लिकन राज्यहरुले अदालतमा मुद्दा दायर गरेका थिए । जसका कारण बाइडेन प्रशासन यो नीति लागु गर्न बाध्य भएको थियो ।

बाइडेन प्रशासन सुरु भएको भोलिपल्टै यो नीति अन्त्य गर्न खोजिएको थियो । जस अनुशार गतबर्षको जुनमा होमल्याण्ड सेक्युरिटीका सेक्रेटरी अलेहान्द्रो मेयरकासले मेक्सिको फिर्ता पठाउने नीतिको अन्त्य गर्दै मेमो जारी गरेका थिए । तर अगस्तमा टेक्सासको संघीय अदालतले मेक्सिको फिर्ता पठाउने नीतिको अन्त्य गर्नमा रोक लगाएको थियो ।

पुनरावेदन चलिरहँदा टेक्सासको अदालतले गरेको फैसला कार्यान्वयन स्थगित गर्नका लागि बाइडेन प्रशासनले अनुरोध गरेपनि उक्त अनुरोध सर्वोच्च अदालतले अस्वीकार गरेको थियो । जसका कारण बाइडेन प्रशासन ट्रम्पकालिन उक्त नीति लागु गर्न बाध्य भएको थियो ।

अक्टोबरमा होमल्याण्ड सेक्युरिटीका सेक्रेटरी अलेहान्द्रो मेयरकासले कार्यक्रम समाप्त गर्ने आदेशका साथ नयाँ मेमो जारी गरेका थिए । जसमा संघीय अदालतले अगस्तमा गरेको फैसलाका प्रकृयागत त्रुटीहरुलाई सम्बोधन गर्न खोजिएको थियो । तर बाइडेन प्रशासनको पुनरावेदनपनि असफल भएपछि गत डिसेम्बरबाट यो नीति नयाँ ढंगले लागु गरिएको थियो । त्यो यता अमेरिकामा शरण खोज्न आएका झण्डै ५ हजारलाई अदालती सुनुवाईसम्मका लागि मेक्सिको फिर्ता पठाइएको छ ।

बाइडेन प्रशासनले नीति लागु गर्दा भने केही नरमपन अपनाएको थियो । ट्रम्प प्रशासनका पालामा यो नीति अन्तरगत झण्डै ७० हजार आप्रवासीहरुलाई अदालती प्रकृयासम्म प्रतिक्षा गर्नका लागि मेक्सिको फिर्ता पठाइएको थियो ।

बाइडेन प्रशासनले बाध्य भएर यो नीति लागु गरेतापनि एसाइलम खोज्नेहरुलाई मेक्सिकोमा प्रतिक्षा गरुन्जेल आवासीय सुविधाका लागि समन्वयमा सहयोग गर्ने जनाएको थियो । सुरक्षित आवासको सुनिश्चित गर्न डिपार्टमेन्ट अफ होमल्याण्ड सेक्युरिटीले अमेरिकाको डिपार्टमेन्ट अफ स्टेटसँग मिलेर काम गर्ने जनाएको थियो ।

त्यस्तै अमेरिकाले अदालती सुनुवाईका लागि मेक्सिकोमा प्रतिक्षा गरेर अमेरिका आउने आप्रवासीहरुलाई पोर्ट अफ इन्ट्रीबाट यातायातको सुविधा समेत उपलब्ध गराएको थियो । यो नीति अन्तरगत बाइडेन प्रशासनले एसाइलम खोज्नेलाई मानवीय व्यवहार गरेर मेक्सिकोमा रहुन्जेलपनि सुरक्षित आवासका लागि सहयोग गर्ने बताएपनि अमेरिका आउनमा रोक लगाउने सन्दर्भमा पनि नीतिको कार्यान्वयन ट्रम्पकै पालामा जस्तो रहेको थियो ।

यो नीति अन्रगत विना भिसा सिमाक्षेत्रबाट आएर अमेरिकामा एसाइलम दावी गर्नेहरु सिधै अमेरिका आएर अध्यागमन अदालतको मुद्दाको प्रतिक्षा गर्न नपाउने व्यवस्था थियो । उनीहरुले अमेरिकामो लामो अध्यागमन प्रकृया मेक्सिकोमा नै बसेर प्रतिक्षा गर्नुपर्ने व्यवस्था थियो ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com