युएससीआईएसले अब निश्चित आवेदनमा अनौपचारिक विवाहलाई पनि मान्यता दिने
प्रकाशित मिति : फाल्गुन २, २०७८ सोमबार
युएससीआईएसले अब निश्चित आवेदनमा अनौपचारिक विवाहलाई पनि मान्यता दिने भएको छ । तत्कालदेखि लागु हुनेगरी शरणार्थी वा एसाइलीका दम्पत्तिले अनौपचारिक विवाह गरेको भएतापनि उनीहरुलाई मूल आवेदकको आधारमा शरणार्थी वा एसाइलीको अध्यागमन सुविधा प्रदान गरिने युएससीआईएसले जनाएको छ ।
उत्पीडनको डरले वा आफ्नो नियन्त्रणबाहिरको अवस्थाका कारण उड्नुपरेकाले औपचारिक वा कानूनी रुपमा विवाह गर्न नसकेकाहरुका सन्दर्भमा एसाइएली र शरणार्थीका दम्पत्तिको अनौपचारिक विवाहलाई पनि मान्यता दिने युएससीआईएसले प्रष्ट पारेको छ । त्यस्तै पहिलोपटक एसाइलम आवेदन दिएको देशमा वा आवेदकको देशमा रहेको प्रतिबन्धात्मक कानून वा अभ्यासका कारण औपचारिक रुपमा विवाह गर्न नसकेकाहरुलाई पनि अनौपचारिक विवाहको प्रमाण पेश गरेको खण्डमा मान्यता दिइनेछ ।
नयाँ निर्देशिकाको पूर्ण पाठ यहाँ पढ्नुहोला ।
अध्यागमन सुविधा प्राप्त गर्नका लागि विवाह उत्सवको स्थानको नियमबाहेक अनौपचारिक विवाहले पनि सबै कानूनी मापदण्डहरु पूरा गरेको हुनुपर्नेछ । एसाइलम आवेदनको फर्म आई ५८९, शरणार्थी दर्ताको फर्म आई ५९० र एसाइलीका आफन्तका लागि फाइल गरिने फर्म आई ७३० का सन्दर्भमा यस्तो अनौपचारिक विवाहलाई मान्यता दिइनेछ । अनौपचारिक विवाहमात्र नभएर अनौपचारिक डिभोर्सलाई पनि मान्यता दिने युएससीआईएसले जनाएको छ । अनौपचारिक विवाहको समेत अनौपचारिक डिभोर्सलाई मान्यता दिइनेछ ।
शरणार्थी दर्ताको फर्म आई ५९० र एसाइलीका आफन्तका लागि फाइल गरिने फर्म आई ७३० का सन्दर्भमा अगाडिको नियम अनुशार अनौपचारिक विवाहले मान्यता नपाएका कारण आवेदन अस्वीकार भएकाहरुको आवेदन पुनर्विचार गरिने समेत युएससीआइएसले जनाएको छ । पेन्डिङ अवस्थामा रहेका वा नयाँ फाइल गरिने एसाइलम आवेदनको फर्म आई ५८९, शरणार्थी दर्ताको फर्म आई ५९० र एसाइलीका आफन्तका लागि फाइल गरिने फर्म आई ७३० का सन्दर्भमा नयाँ नियम लागु हुनेछ ।
परिवारका लागि फाइल गरिने आई १३० आवेदनका सन्दर्भमा भने यो नियम लागु नहुने युएससीआईएसले प्रष्ट पारेको छ । विगतमा युएससीआईएसले शरणार्थी स्थितिको अद्वितीय र मानवीय प्रकृतिका कारण शरणार्थी निर्णयको उद्देश्यका लागि निश्चित परिस्थितिहरूमा अनौपचारिक विवाह वा शिविर विवाहलाई मान्यता दिदै आएको छ ।
धार्मिक, जातीय वा समलैंगिकताका आधारमा औपचारिक रुपमा विवाह गर्न नसकेका र अनौपचारिक रुपमा मात्र विवाह गरेकाहरुलाई यो नियमबाट फाइदा पुग्न सक्नेछ । अरब देशहरु लगायतका कैयन देशमा फरक फरक धर्मका व्यक्तिलाई विवाह गर्न कठिन हुने गरेको छ भने कतिपय देशमा समलिंगी विवाहले मान्यता पाएका छैनन् । यो अवस्थामा शरणार्थी र एसाइलीका अनौपचारिक विवाहलाई युएससीआईएसले मान्यता दिनेछ ।