युएससीआईएसमा ४ लाख १२ हजार एसाइलम पेन्डिङ, पूराना आवेदनको निर्णय छिटो दिने नीति ल्याइदै
प्रकाशित मिति : माघ २१, २०७८ शुक्रबार
अमेरिकाको युएससीआईएसमा ४ लाख १२ हजार ७ सय ९६ जनाको एसाइलम आवेदन पेन्डिङ अवस्थामा रहेको जनाइएको छ । युएससीआईएसले संसदलाई बुझाएको रिपोर्टमा चालु आर्थिक बर्षको सुरुमा ४ लाख भन्दा बढी आवेदन पेन्डिङ रहेको जनाइएको हो ।
युएससीआईएसमा कायम ब्याकलगका कारण कतिपय एसाइलम आवेदकले अन्तरवार्ताका लागि ७ बर्षभन्दा लामो समयदेखि कुरिरहेका छन् । जसमा नेपालीहरुको संख्या पनि उल्लेख्य रहेको छ । ३ लाख ८० हजार आवेदनको नेट ब्याकलग रहेको र चालु आर्थिक बर्षका तीन महिनामा १७ हजार ६ सय १२ आवेदनमा निर्णय गरिएको युएससीआईएसले जनाएको छ ।
युएससीआईएसले एसाइलमका आवेदनहरु पहिले प्राप्त भएको आवेदनमा पहिले निर्णय दिने नीति अनुशार काम नगरी पछि प्राप्त आवेदनलाई सबैभन्दा पहिले निर्णय दिने नीति अन्तरगत काम गर्दै आएको छ । जसका कारण सुरुमा आवेदन दिएका हजारौं अन्तरवार्ताको प्रतिक्षामा छन् भने पछि आवेदन दिएकाहरुले ग्रिनकार्डसमेत पाइसकेका छन् ।
संसदलाई बुझाएको रिपोर्टमा युएससीआईएसले पुराना आवेदनमा छिटो निर्णय दिने नीति ल्याउने उल्लेख गरेको छ । ब्याकलग घटाउनका लागि पूराना आवेदनलाई निर्णय दिनेगरी ध्यान केन्द्रीत गर्ने युएससीआईएसले जनाएपनि कहिलेदेखि नीति परिवर्तन गर्ने भन्नेबारे केही बताएको छैन ।