अमेरिकामा ४४ लाख आवेदन पेन्डिङ, अब एसाइलमसहित ७ प्रकारका आवेदन प्राथमिकता दिइने
प्रकाशित मिति : माघ २१, २०७८ शुक्रबार
अमेरिकाको युएससीआईएसमा झण्डै ७ लाख ग्रिनकार्ड आवेदनसहित झण्डै ४४ लाख अध्यागमन आवेदनहरु पेन्डिङ रहेको रिपोर्ट युएससीआईएसले संसदलाई बुझाएको छ । युएससीआईएसमा कायम ब्याकलगका कारण आवेदकले लामो समय प्रतिक्षा गर्नुपर्ने अवस्था श्रृजना भएको छ ।
ब्याकलग कम गर्नका लागि युएससीआईएसले कतिपय आवेदनमा बायोमेट्रिक छुट प्रदान गर्दै पुरानौ बायोमेट्रिक डाटाहरु प्रयोग गरिरहेको छ । कतिपय आवेदनमा अन्तरवार्ता छुटको व्यवस्था गरिएको छ । विभिन्न तरिकाहरु अपनाएपनि युएससीआईएसमा आवेदनको ब्याकलग अझै पनि चर्को अवस्थामा नै रहेको देखिएको छ ।
युएससीआईएसले एसाइलमबाहेकका अन्य आवेदनहरु पहिले प्राप्त भएको आवेदनमा पहिले निर्णय दिने नीति अनुशार नै काम गरिरहेको छ । तर एसाइलमको आवेदनमा भने पछि प्राप्त आवेदनलाई सबैभन्दा पहिले निर्णय दिने नीति रहेको छ । जसका कारण ७ बर्षभन्दा लामोसमय देखि एसाइलमको अन्तरवार्ता कुरेर बस्नेहरुको संख्या दशौं हजार रहेको छ ।
युएससीआईएसले ब्याकलग कम गर्न विभिन्न ७ प्रकारका आवेदनहरुलाई प्राथमिकता दिने जनाएको छ । यी आवेदनहरु झण्डै २७ लाख अर्थात कुल ब्याकलगको ६१ प्रतिशत रहेको युएससीआईएसले जनाएको छ । नागरिकता आवेदन, एसाइलम आवेदन, यु भिसा आवेदन, परिवारमा आधारित ग्रिनकार्ड आई १३० आवेदन, ग्रिनकार्ड आवेदन, २ बर्षे ग्रिनकार्डको शर्त हटाउने आवेदन र वर्क परमिटको आवेदनलाई प्राथमिकता दिने युएससीआईएसले जनाएको छ ।
संसदलाई बुझाएको रिपोर्टमा युएससीआईएसले पुराना आवेदनमा छिटो निर्णय दिने नीति ल्याउने उल्लेख गरेको छ । ब्याकलग घटाउनका लागि पूराना आवेदनलाई निर्णय दिनेगरी ध्यान केन्द्रीत गर्ने युएससीआईएसले जनाएपनि कहिलेदेखि नीति परिवर्तन गर्ने भन्नेबारे केही बताएको छैन ।
पछिल्लो रिपोर्ट अनुशार युएससीआईएसमा परिवारमा आधारित ग्रिनकार्डका ५ लाख ४ हजार आवेदन पेन्डिङ अवस्थामा रहेका छन् भने वर्क परमिटका १३ लाख ३६ हजार आवेदन पेन्डिङ रहेका छन् । त्यस्तै एसाइलीका ग्रिनकार्ड आवेदन ८६ हजार, क्युबन १४ हजार, रोजगारमा आधारित २ लाख ४५ हजार, परिवारमा आधारित ३ लाख ४९ हजार, शरणार्थी २४ हजार र अन्य ४७ हजार ग्रिनकार्ड आवेदन पेन्डिङ रहेका छन् ।
एसाइलमका आवेदनहरु ४ लाख १२ हजार पेन्डिङ अवस्थामा रहेका छन् । शर्त सहितको ग्रिनकार्डको शर्त हटाउन दिइएका आवेदन २ लाख ३२ हजार, सैन्य नागरिकता आवेदन ५ हजार ८ सय र नियमित नागरिकता आवेदन ८ लाख ३३ हजार पेन्डिङ अवस्थामा रहेका छन् । आर्थिक बर्ष २०२२ मा ५ लाख ८७ हजार कुल आवेदनमा निर्णय दिइएको युएससीआईएसले जनाएको छ ।
सरकारको नियन्त्रणबाहिर ८३ हजार आवेदनहरु रहेको युएससीआईएसले जनाएको छ । भिसा नम्बरको प्रतिक्षा गरिरहेका, थप प्रमाण मागेपछि प्रमाण उपलब्ध नगराएका र नागरिकताका लागि पुन परीक्षा गर्नुपर्ने अवस्थामा रहेका आवेदनलाई सरकारको नियन्त्रणबाहिरका आवेदनका रुपमा राखिएको छ ।