दुबै डोज भ्याक्सिन लगाएकाहरु १४ दिनपछि मास्क नलगाई भेट्न सक्ने सीडीसी निर्देशिका जारी
प्रकाशित मिति : फाल्गुन २४, २०७७ सोमबार
कोरोनाबिरुद्धको भ्याक्सिनका सबै डोज लगाएका व्यक्ति मास्क नलगाइकन पनि निजी स्थलमा एकआपसमा भेटघाट गर्न सक्ने अमेरिकन सीडीसीले नयाँ निर्देशिका जारी गरेको छ । तर सार्वजनिक स्थलमा भने मास्क लगाउनुपर्ने सीडीसीले जनाएको छ ।
त्यस्तै ठूला जमघटहरुमा सकभर सहभागी नहुन समेत सीडीसीले सोमबार जारी गरेको निर्देशिकामा उल्लेख छ । एजेन्सीले पूर्णरुपमा भ्याक्सिन लगाइसकेका व्यक्तिका लागि के गर्न हुने र के गर्न नहुने सन्दर्भमा बहुप्रतिक्षित निर्देशिका जारी गरेको हो ।
मोडेर्ना र फाइजरको दोश्रो डोज लगाएको १४ दिनपछिमात्र व्यक्तिलाई पूर्णरुपमा इम्युनाइज भएको मानिनेछ । त्यस्तै जोन्सन एण्ड जोन्सनको भ्याक्सिन भने एकडोजमात्र लगाए पुग्ने भएकाले उक्त भ्याक्सिन लगाएको दुईसातापछि नै व्यक्तिलाई पूर्णरुपमा इम्युनाइज भएको मानिने सीडीसीले जनाएको छ ।
निर्देशिकाको पूर्ण पाठ
भ्याक्सिनको पूर्ण डोज लगाएको १४ दिनपछि सामाजिक दुरी कायम नगरीकन र मास्क नलगाइनक भ्याक्सिन लगाएका व्यक्तिहरुबीचमात्र भेटघाट गर्न सकिने सीडीसीको निर्देशिकामा उल्लेख छ । तर भ्याक्सिन लगाएका र नलगाएका धेरैजना व्यक्तिबीच निजी स्थलमा भेटघाट गर्दा भने मास्क लगाउन र सामाजिक दुरी कायम गर्न सुझाव दिइएको छ ।
तर भ्याक्सिन लगाएको व्यक्तिले कम जोखिममा रहेको भ्याक्सिन नलगाएको एउटा परिवारसम्मलाई मास्क नलगाई र सामाजिक दुरी कायम नगरी भेट्न सकिने जनाइएको छ । उदाहरणका लागि भ्याक्सिन लगाएका हजुरबा हजुरआमाहरुले उनीहरुका भ्याक्सिन नलगाएका नातीनातिनीहरु वा छोराछोरीहरुलाई भेट्न सक्नेछन् । तर भ्याक्सिन नलगाएका नातीनातिनीहरु व छोराछोरीहरु जोखिममा रहेका व्यक्ति हुनुहुँदैन ।
अहिलेसम्म अमेरिकामा झण्डै १० प्रतिशत व्यक्तिले पूर्णरुपमा भ्याक्सिन लगाएको सीडीसीले जनाएको छ । त्यसैले सार्वजनिक स्थलमा र सार्वजनिक जमघटमा भने सबैलाई मास्क लगाउन र सामाजिक दुरी कायम गर्न सुझाव दिइएको छ ।