मोडेर्ना, फाइजर र जोन्सन एण्ड जोन्सन भ्याक्सिनबीचका ६ फरक
प्रकाशित मिति : फाल्गुन २२, २०७७ शनिबार
अमेरिकामा अहिले तीनवटा कम्पनीले उत्पादन गरेका कोरोनाबिरुद्धका भ्याक्सिन उपलब्ध छन् । डिसेम्बरदेखि मोडेर्ना र फाइजरको भ्याक्सिन उपलब्ध भएको अमेरिकामा मार्चदेखि जोन्सन एण्ड जोन्सनको भ्याक्सिन पनि लगाउन सुरु गरिएको छ ।
डोज
मोडेर्ना र फाइजरका भ्याक्सिन दुईदुई डोज लगाउनुपर्छ । मोडेर्ना भ्याक्सिन २८ दिनको अन्तरमा र फाइजर भ्याक्सिन २१ दिनको अन्तरमा दुईडोज लगाउनुपर्छ । तर जोन्सन एण्ड जोन्सन भ्याक्सिन एकडोज लगाएमात्र पुग्छ । सबै भ्याक्सिन पाखुरामा लगाउनुपर्छ ।
प्रभावकारिता
मोडेर्ना भ्याक्सिन दुई डोज लगाएपछि लक्षणयुक्त सक्रमण रोक्न ९४ दशमलव १ प्रतिशत प्रभावकारी रहेको छ भने सिकिस्त हुनबाट रोक्न शतप्रतिशत प्रभावकारी रहेको छ । त्यस्तै फाइजरको भ्याक्सिन लक्षणयुक्त सक्रमण रोक्न ९५ प्रतिशत प्रभावकारी रहेको छ भने सिकिस्त हुनबाट रोक्न शतप्रतिशत प्रभावकारी रहेको छ । जोन्सन एण्ड जोन्सनको भ्याक्सिन ठीक्कदेखि सिकिस्तसम्मको संक्रमण रोक्न ६६ प्रतिशत प्रभावकारी रहेको छ भने सिकिस्त हुनबाट रोक्न ८५ प्रतिशत प्रभावकारी रहेको छ ।
अस्पताल र मृत्यु रोक्न प्रभावकारी
मोडेर्नाको दोश्रो डोज लगाएको १४ दिनपछि कोरोनाको कारण अस्पताल भर्ना हुने र मृत्यु हुनेदर शुन्य रहेको छ । फाइजरको दोश्रो डोज लगाएको एकसातापछि कोरोनाको कारण अस्पताल भर्ना हुने र मृत्यु हुनेदर शुन्य रहेको छ । त्यस्तै जोन्सन एण्ड जोन्सनको एउटा डोज लगाएको २८ दिनपछि कोरोनाको कारण अस्पताल भर्ना हुने र मृत्यु हुनेदर शुन्य रहेको छ ।
साइड इफेक्ट
मोडेर्ना र फाइजरको तुलनामा जोन्सन एण्ड जोन्सनका साइड इफेक्ट पनि कम छन् । जोन्सन एण्ड जोन्सनको भ्याक्सिन ड्राइभ थु्रमा पनि लगाउन सकिन्छ । मोडेर्ना भ्याक्सिन लगाएपछि पाखुरा दुख्ने ९१ दशमलव ६ प्रतिशत, थकान ६८ दशमलव ५ प्रतिशत, टाउको दुख्ने ६३ प्रतिशत, मांशपेशी दुख्ने ५९ दशमलव ६ प्रतिशत, जोर्नी दुख्ने ४४ दशमलव ८ प्रतिशत, जाडो हुने ४३ दशमलव ४ प्रतिशत देखिएको छ ।
फाइजर भ्याक्सिन लगाएपछि पाखुरा दुख्ने ८४ दशमलव १ प्रतिशत, थकान ६२ दशमलव ९ प्रतिशत, टाउको दुख्ने ५५ दशमलव १ प्रतिशत, मांशपेशी दुख्ने ३८ दशमलव ३ प्रतिशत, जोर्नी दुख्ने २३ दशमलव ६ प्रतिशत, ज्वरो आउने १४ दशमलव २ प्रतिशत देखिएको छ ।
जोन्सन एण्ड जोन्सन भ्याक्सिन लगाएपछि पाखुरा दुख्ने ४८ दशमलव ६ प्रतिशत, थकान ३८ दशमलव २ प्रतिशत, टाउको दुख्ने ३८ दशमलव ९ प्रतिशत, मांशपेशी दुख्ने ३३ दशमलव २ प्रतिशत देखिएको छ ।
कति समयपछि संरक्षण
मोडेर्ना भ्याक्सिनको पहिलो डोज लगाएको १० देखि १४ दिनपछि कोरोनाबिरुद्ध संरक्षण प्रदान गर्न सुरु गर्छ । पूर्ण संरक्षण भने दोश्रो डोज लगाएको १४ दिनपछि प्राप्त हुन्छ । फाइजर भ्याक्सिनको पहिलो डोज लगाएको १० देखि १४ दिनपछि कोरोनाबिरुद्ध संरक्षण प्रदान गर्न सुरु गर्छ । पूर्ण संरक्षण भने दोश्रो डोज लगाएको एकसातापछि प्राप्त हुन्छ । जोन्सन एण्ड जोन्सनको भ्याक्सिन लगाएको १४ दिनपछि कोरोनाबिरुद्ध संरक्षण प्रदान गर्न सुरु गर्छ भने २८ दिनपछि पूर्ण संरक्षण प्राप्त हुन्छ ।
भ्याक्सिन स्टोर
मोडेर्ना भ्याक्सिन अस्पताल र क्लीनिकहरुले ३० दिनसम्म फ्रिजमा स्टोर गरेर राख्न सक्छन् । फाइजर भ्याक्सिन ५ दिनसम्ममात्र अस्पताल र क्लीनिकहरुले फ्रिजमा स्टोर गरेर राख्न सक्छन् । जोन्सन एण्ड जोन्सनको भ्याक्सिन अस्पताल र क्लीनिकहरुले ३ महिनासम्म फ्रिजमा स्टोर गरेर राख्न सक्छन् । जोन्सन एण्ड जोन्सनको भ्याक्सिन मोडेर्ना र फाइजरको तुलनामा उत्पादन गर्न सस्तो र सजिलो रहेको छ ।