न्युयोर्कका रक्तदाता मैनालीलाई न्युयोर्क ब्लड सेन्टरबाट ‘प्रेसिडेन्ट अवार्ड’
प्रकाशित मिति : माघ १३, २०७७ मंगलबार
अमेरिकामा रहेका चर्चित नेपाली मुलका रक्तदाता अर्जुन मैनालीलाई न्युयोर्क ब्लड सेन्टरका तर्फबाट प्रेसिडेन्ट अवार्ड प्रदान गरिएको छ । न्युयोर्क ब्लड सेन्टरका अध्यक्ष डा. क्रिष्टोफर हिल्लिएरले समुदाय र मानवताका लागि मैनालीको अविश्वसनीय र वीरतापूर्ण सेवा र योगदानको कदर गर्दै प्रेसिडेन्ट अवार्ड प्रदान गरिएको जानकारी दिएका हुन् ।
कोरोना महामारीको बेलामा रगत संकलनको धेरै चुनौति रहेको र यस्तो बेलामा समेत मैनालीले गरेको रक्तदान र दान समुदायको हित र सुरक्षाको लागि अविश्वासनिय रुपमा महत्वपूर्ण रहेको भन्दै अध्यक्ष डा हिल्लिएरले धन्यवाद ज्ञापन गरेका छन् ।
कोरोना महामारीमा रक्तदान गर्न नहुने र गरेमा रक्तदान गर्दा शरीरको प्रतिरक्षा प्रणाली कम हुने भ्रमका कारण धेरैले रक्तदान नगरेको अवस्थामा मैनालीले भने नियमित रक्तदान गरेका थिए । बिरामीहरु बचाउन यस्तै गाह्रो परिस्थितीमा झन बढी रक्तदान गर्नु पर्छ भनेर आफूले महामारीमा पनि निरन्तर रक्तदान गरेको मैनालीले बताए ।
मैनालीले अप्रिल २४, २०२० देखी जनवरी १२, २०२१ को बीचमा २३ पटक रगत र प्लेट्लेट्स दान गरेका थिए । ८ महिनाको अबधिमा उनले ११ लिटर रक्तदान गरे । मैनालीले विश्वका १७ देशमा १९५ पटक रक्तदान गरिसकेका छन् ।
मैनालीले भने ‘मेरो आफ्नै रगतले धेरै जनालाई बचाउन सहयोग मिलेकोमा धेरै खुशी लागेको छ ।’