अक्टोबर र नोभेम्बरमा २०२१ का नेपाली डिभी विजेतालाई सिमाबन्दी, भिसा जनवरी अगाडि नपाउने
प्रकाशित मिति : आश्विन ८, २०७७ बिहीबार
अमेरिकी सरकारको विदेश मन्त्रालय ब्यूरो अफ कन्सुलर अफेयर्सले अक्टोबर महिनाको भिसा बुलेटिन जारी गरेको छ । अमेरिकी राष्ट्रपति डोनाल्ड ट्रम्पले आगामी डिसेम्बरसम्म २०२१ का डिभी विजेताहरुलाई कार्यकारी आदेशमार्फत भिसामा रोक लगाएका छन् भने अर्कोतर्फ ब्यूरो अफ कन्सुलर अफेयर्सले पनि भिसा बुलेटिनमार्फत सिमाबन्दी लगाएको छ ।
आगामी डिसेम्बरसम्म २०२१ का डिभी विजेताहरुले भिसा पाउने सम्भावना नरहेपछि अमेरिकामा रहेका डिभी विजेताहरुले भने आफ्नो स्टाटस एड्जस्ट गर्न सक्नेछन् । अक्टोबर महिनाका लागि नेपाली डिभी विजेता नेपालीहरुका लागि १०५० सम्म केस नम्बरको सिमाबन्दी तोकिएको छ । अर्थात १०५० भन्दा तल केस नम्बर हुनेहरुले अक्टोबरमा प्रकृया अगाडि बढाउन सक्नेछन् ।
त्यस्तै नोभेम्बरका लागि नेपालीहरुका लागि २७ सय सम्म केस नम्बरको सिमाबन्दी तोकिएको छ । अर्थात् अमेरिकामा हुने २७ सयसम्म केस नम्बर हुनेहरुले नोभेम्बरमा स्टाटस एड्जस्ट गर्न सक्नेछन् । अमेरिकामा गैरकानुनी उपस्थीति नभएकाहरुलेमात्र भिसा एड्जस्ट गर्न सक्छन् ।
खासगरी अमेरिकामा विद्यार्थी लगायत विभिन्न गैरआप्रवासी भिसामा रहेकाहरु र टीपीएसमा जानु अगाडि गैरकानुनी उपस्थीति नभएका टीपीएसवाहकले समेत स्टाटास एड्जस्ट गर्न सक्नेछन् । अमेरिकाबाहिरबाट कन्सुलर प्रकृयाबाट भिसा लिन चाहनेहरुले भने आगामी जनवरीसम्म प्रतिक्षा गर्नुपर्ने देखिएको छ ।
व्यवहारिक रुपमा भने २७ सय सम्म केस नम्बर हुने डिभी विजेता नेपालीहरुले आगामी जनवरीमा भिसा प्राप्त गर्नसक्नेछन् । त्यो अगाडि उनीहरुले बाँकी प्रकृया भने अगाडि बढाउन सक्नेछन् । यस्तो सिमाबन्दी इजीप्ट र इरानलाई पनि तोकिएको छ ।
सन् २०२० को डिभीमा छनौट भएका २६ सय बढीले भिसा पाएनन्
सन् २०२० को डिभी लोटरीका लागि छनौट भएका २६ सय भन्दा धेरै नेपालीहरु भिसाको प्रतिक्षामा रहेका थिए । उनीहरुले सेप्टेम्बरको अन्त्यसम्मा भिसा पाइसक्नुपर्ने नियम रहेको छ । सेप्टेम्बरसम्म भिसा नपाए सन् २०२० को डिभी समाप्त हुने नियम रहेको छ ।
मार्च महिनाको झण्डै दुईसाताको अवधिमा १८८ जना नेपालीहरुले डाइभर्सिटी भिसा प्राप्त गरेका थिए । मार्च १७ पछि भने अमेरिकी दूतावास काठमाडौंले डाइभर्सिटी भिसा र गैर आप्रवासी भिसाका अन्तरवार्ताहरु स्थगित गरेको थियो । तर अन्तरवार्ता स्थगित हुनु अगाडि मार्चमहिनामा प्राथमिक डिभी विजेता ११२ जना, उनीहरुका दम्पत्ति ४२ जना र २१ बर्ष नपुगेका छोराछोरीहरु ३४ जना नेपालीले भिसा प्राप्त गरेका थिए ।
फरबरीमा भने डिभी विजेता, उनीहरुका दम्पत्ति र छोराछोरीगरी ३०३ जना नेपालीहरुले भिसा पाएका थिए । उनीहरुमध्येका कैयन कोरोनाको महामारीका कारण अमेरिका आउन पाएका छैनन् । त्यस्तै जनवरीमा ४१२ जना नेपालीले डाइभर्सिटी भिसा पाएका थिए ।
चालु आर्थिक बर्षका लागि ३६९६ जना नेपालीहरुले डिभी लोटरी पारेका थिए । तर उनीहरुमध्ये जम्मा १०६९ जना प्राथमिक डिभी विजेताहरुलेमात्र अमेरिकाको भिसा प्राप्त गरिसकेका छन् ।
२०२१ का लागि डिभी लोटरी विजेता नेपाली ३८०१, एसियामै दोश्रो
अमेरिकी सरकारको डिपार्टमेन्ट अफ स्टेट ब्यूरो अफ कन्सुलर अफेयर्सले सन् २०२१ का लागि डिभी विजेता नेपालीहरुको संख्या ३८०१ रहेको जनाएको छ ।
उनीहरुले गत अक्टोबरको २ देखि नोभेम्बर ५ सम्म डिभी लोटरी भरेका थिए । गत जुन ६ मा डिभी लोटरीको नतिजा आएपनि कतिजनालाई डिभी लोटरी परेको थियो भन्नेबारे सार्वजनिक गरिएको थिएन ।
सन् २०२१ का डिभी लोटरी पारेकाहरुले आगामी अक्टोबर १ देखि भिसा पाउन सुरु गर्ने नियम भएपनि अमेरिकी राष्ट्रपति डोनाल्ड ट्रम्पको कार्यकारी आदेशका कारण भिसा पाउन कम्तीमा आगामी जनवरीसम्मका लागि ढिलाई हुने भएको छ । अर्थात् उनीहरुले सन् २०२१ को जनवरीपछिमात्र भिसा प्राप्त गर्न सक्नेछन् ।
डिभी विजेतामा नेपाल एसियामा दोश्रो
सन् २०२१ का डिभी विजेताहरुमा नेपाल एसियामा दोश्रो भएको छ । सबैभन्दा धेरै डिभी विजेताहरु इरानका ६ हजार १ जना रहेका छन् । सन् २०२१ का लागि विश्वमै सबैभन्दा धेरै डिभी विजेताहरु भने इजिप्टका ६ हजार २ जना रहेका छन् । त्यस्तै अल्जेरियाका ६ हजार १ जना र सुडानका ६ हजार १ जना रहेका छन् ।
युरोपमा भने रसियाका ६ हजार १, युक्रेनका ५६ सय ०४ र अल्बानियाका ३९ सय ६२ जनाले डिभी लोटरी पारेका छन् । रोचक त के छ भने इरान, अल्जेरिया, सुडान र रसियाका नागरिकलाई एउटै संख्यामा अर्थात् हरेक देशका ६ हजार १ लाई डिभी लोटरी परेको छ ।
नर्थ कोरियाका ३ जनालाई डिभी लोटरी
सन् २०२१ का लागि नर्थ कोरियाका ३ जनालाई डिभी लोटरी परेको छ । बु्रनाईका १ जनालाई डिभी परेको छ भने एकजनालाईमात्र डिभी लोटरी परेका अन्य देशहरु झण्डै आधादर्जन छन् ।
डिभीको नतिजा चेक गर्न र डिभी भर्न यो वेवसाइटमा क्लीक गर्नुहोला ।