चुनाव अघि न्यायाधिस नियुक्तीका लागि मतदान नगर्ने रिपब्लिकन सांसदको संख्या २ पुग्यो
प्रकाशित मिति : आश्विन ४, २०७७ आईतबार
![](https://i0.wp.com/www.khasokhas.com/wp-content/uploads/2020/08/Capitol-hill.jpg?fit=2202%2C1388&ssl=1)
अमेरिकी राष्ट्रपति डोनाल्ड ट्रम्पले रुथ बेडर गिन्सबर्गको मृत्युपछि रिक्त रहेको सर्वोच्च अदालतको न्यायाधिसमा एकजना महिलाको नाम अर्कोसाता सिफारिस गर्ने बताइरहँदा सिनेटमा चुनाव अगाडि न्यायाधिसका लागि मतदान नगर्ने रिपब्लिकन सांसदहरुको संख्या २ पुगेको छ । न्यायाधिस नियुक्तीका लागि राष्ट्रपतिले सिफारिस गरेको नाममा सिनेटमा बहुमत हुन आवश्यक छ ।
५३ जना रिपब्लिकन सिनेटरहरु रहेको वर्तमान सिनेटमा २ जनाले न्यायाधिसका पक्षमा मत नहाल्दासमेत बाँकी सबैले हालेमा मतसंख्या ५१ पुग्नेछ । तीनजना रिपब्लिकनले न्यायाधिस नियुक्तीका पक्षमा मत नहालेमा पचासमतमात्र खसेमा उपराष्ट्रपतिलाई निर्णायक मत हाल्ने अधिकार छ । तर तीनजनाभन्दा बढी रिपब्लिकन सिनेटरहरुले न्यायाधिसका लागि मत नहालेमा नियुक्ती अवरुद्ध हुनेछ ।
मेन राज्यबाट रिपब्लिकन सिनेटर सुजन कोलिन्सले न्यायाधिस नियुक्तीका लागि चुनाव अगाडि मत नहाल्ने घोषणा गरिसकेकी छिन् । लगत्तै अलास्काकी रिपब्लिकन सिनेटर लिसा मुर्कोस्कीले पनि न्यायाधिस नियुक्तीका लागि चुनाव अगाडि मत नहाल्ने घोषणा गरेकी छिन् । जसका कारण चुनाव अगाडि नै कन्जरभेटिभ न्यायाधिस नियुक्त गर्ने ट्रम्पको चाहना पूरा हुने सम्भावना साँगुरो हुँदै गएको छ ।
अमेरिकाको सर्वोच्च अदालतकी न्यायाधिस रुथ बेडर गेन्सबर्गको निधन लगत्तै सिनेटका रिपब्लिकन नेता मिच म्याक्कोनेलले उनको स्थानमा नियुक्तिका लागि प्रस्ताव गरिने न्यायाधिसका पक्षमा सिनेटमा मतदान गरिने बताएका थिए । चुनाव अगाडि नै नयाँ न्यायाधिस नियुक्त गरिएको खण्डमा अमेरिकाको सर्वोच्च अदालतमा ६ जना रिपब्लिकनले नियुक्त गरेका न्यायाधिस र ३ जना डेमोक्र्याट्सले नियुक्त गरेका न्यायाधिसहरु हुनेछन् ।
सर्वोच्च अदालतमा ६ जना कन्जरभेटिभ न्यायाधिस हुँदा अमेरिकाको राजनीतिक परिदृश्यमा ठूलो असर पर्नसक्ने सम्भावना रहन्छ । गेन्सबर्गको निधन अगाडि सर्वोच्च अदालतमा ५ जना रिपब्लिकन नियुक्त र ४ जना डेमाक्र्याट्स नियुक्त न्यायाधिसहरु रहेका थिए । ५ जना कन्जरभेटिभ र ४ जना लिबरल न्यायाधिस हुँदा प्राय राष्ट्रिय मुद्दामा रिपब्लिकनका पक्षमा निर्णय हुँदै आएको थियो ।
नोभेम्बरको चुनाव अगाडि नै रिपब्लिकनले नयाँ न्यायाधिस नियुक्त गर्न सफल भएमा यसको असर अमेरिकी राजनीतिमा आगामी कैयन बर्षसम्म पर्नेछ । अमेरिकाको सर्वोच्च अदालतका न्यायाधिस नियुक्त गर्दा राष्ट्रपतिले नोमिनेशन गर्ने र सिनेटमा मतदान हुने प्रावधान रहेको छ ।
सन् २०१६ मा न्यायाधिस एन्टोनिन स्कालियाको निधन फरबरीमा हुँदा तत्कालिन राष्ट्रपति बराक ओबामाले गाल्र्याण्डलाई नोमिनेट गरेका थिए । तर सिनेटले चुनाव अगाडि न्यायाधिसको नाममा मतदान गरेन । पछि डोनाल्ड ट्रम्प नियुक्त भइसकेपछि निल गोर्सचलाई नियुक्त गरेका थिए भने सिनेटले पनि उनको नाम पारित गरेको थियो ।
बिल क्लिन्टनले गेन्सबर्गलाई सन् १९९३ मा सर्वोच्च अदालतको न्यायाधिस नियुक्त गर्दा पनि झण्डै ७० दिन लागेका थियो ।
यसअगाडि सन् २०१८ मा रिटायर्ड भएका एन्थोनी केनेडीको स्थानमा पनि डोनाल्ड ट्रम्पले नै न्यायाधिस नियुक्त गरेका थिए । एन्थोनी केनेडीलाई रोनाल्ड रेगनले नियुक्त गरेपनि उनी सधै कन्जरभेटिकका पक्षमा भने उभिएका थिएनन् । बराक ओबामाको कार्यकालमा भने सर्वोच्च अदालतमा २ जना न्यायाधिस नोमिनेट गरेका थिए, जसमा दुबैजना महिला थिए ।
सर्वोच्च अदालतमा रिपब्लिकन नियुक्त न्यायाधिस ६ जना पुगेमा कुनै पनि प्रगतिशिल मुद्दाका पक्षमा सर्वोच्चबाट निर्णय पाउन मुस्किल हुनेछ ।